Къизилдикай зар

Са сеферда “Кард” журналдин редактор рагьметлу Расим Гьажидин кабинетда даргийрин шаир Су­лейман Рабаданова, зун Сулейман-Стальский райондай тирди чир хьайила, суьгьбетнай: “СтIал Сулейман вичихъ тай авачир зурба кас хьана. Дуьнья амай кьван ам ахтармишна акьалтI­дач. Ам неинки са лезгийрин, гьакIни Да­гъустандин, гьат­та ви­ри­ уьлкведин дамах я. Ада, лезгияр хьиз, чи Дагъустан вири дуьнья­диз машгьурна. Квез, Сулейманан ватанэгьлийриз, бармакдин чи­чIер вилера твадай ихтияр авайди туш. Куьн эбеди уьзягъбур я. ГьакI  хьунни герек я…”

Сулейман Рабаданов са геренда хияллу хьана, ахпа давамарна:

“Расул Гьамзатов, зи фикирда амач, са гьи уьлкведай ятIа командировкадай хтанвай. Чун, са жерге жегьил шаирар (чахъ Жамидинни галай, ам Расу­лан рикI алай дуст тир), адаз хвашкалди лу­гьуз фенвай. Суьгьбетар ийидай арада Расул са гьихьтин ятIа­ни хи­ялри тухванвай. Жа­мидина, куь кефияр авачни, вун са жуьреда аквазва хьи лагьайла, Расу­ла жаваб ганай: “За анжах са кье­­тIен кар­дикай фикирзава. Ам кьилиз акъа­тнай­тIа, зи рикI секин же­дай…” Ахпа ада да­вамарна: “Зун командировкада авайла, зи патав са дишегьли атана, зав ктабдал къул чIугваз туна, куьн гьинай я лагьана, за­вай хабар кьуна. За Да­гъустандай я лагьана жаваб гана. Ди­шегьли­ди ам гьина авай вилаят я лагьа­на мягь­тел  хьана, суал хга­на­. За адаз Сулейманан ватан я лагьай­ла, ам гьасятда, агьан, гъавурда акьуна лагьана, хъфенай…”

— Ина кефи чIур жедай вуч кар ава кьван? — тажуб хьанай Жамидин…

Расул гьа пакад юкъуз физва Кьасумхуьрел, райкомдин секретарь Зейдуллагь Мегьтиеван патав. Лугьузва: “Дагъустан чиз­вач — Сулейман чизва! ЦIи Сулейманан виш йис тамам жезва. Ша чна Кьасумхуьруьн район адан тIвару­нихъ ягъин. Мярекатралди­ акьван вахт амач, заз куь разивал кIанзава. Амай вири кIвалахар за кьилиз акъудда…”

Райкомдин секретарди бюро эвер гузва ва бюродин членри рейсадвилелди чпин разивал къалурзава. Арадай акьван вахт фенач, 1969-йисан майдин вацра РСФСР-дин Верховный Советдин къарар акъат­зава: Кьасумхуьруьн район Сулейманан тIва­рунихъ язава.

“Ам Расула, райондин жемятдин разивални аваз, авур кар тир. Чизвани ваз?” — хабар кьунай Сулейман Рабаданова завай…

Дугъриданни, а къарар Расул Гьамзатова Кьасумхуьруьн са мертебадин накь­вадин керпичрин клубда раиж авунай. Аниз чи, ЦIийи Макьарин, юкьван школадай директор Алиев Рамазана шко­ладин машинда аваз 10-классда кIел­­завай вад аялни (абурун арада зунни авай), Кьасумхуьрел тухванай.

А мярекатдал патарилай атанвай гзаф мугьманар, Сулейманан гада Мирзеюсуфни раханай. Ада бубадин девирда чпин кIваляй йифиз-юкъуз мугьман кими тахьай­ди рикIел хканай…

Райондиз чIехи шаирдин тIвар гуни халкьдик руьгь кутунай. Ина къени а кардал шадвалзава. Сулейманан тIвар чи ме­­церилай са юкъузни кими жезвач. Ам ча­вай яргъа жердавай кIанивал датIана артух жезва… Сулейманан тIвар алай зи район къе пайдахрик ква, къизилдикай зар алай…

Шагьабудин Шабатов


Всего просмотров: 43

Читайте также: