КIвалерин куьлегар вахкуда

6-ноябрдиз Дагъустандин Гьукуматдин Председателдин Сад лагьай заместителдин везифаяр вахтуналди тамамарзавай Анатолий Къарибован регьбервилик кваз етим ва диде-бубайрин къаюмвиликай хкатнавай аялар кIвалералди таъминаруниз талукь месэладай совещание кьиле фена. Идакай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.

Совещанидал, кьилди къачуртIа, ихтилат Махачкъаладай тир ва чпихъ яшамиш жедай­ кIвалер авачир етим 41 аялдикай физвай.

Сад лагьай вице-премьерди, сифте нубатда, кIватI хьанвайбурун фикир аялар ери авай кIвалералди таъминарун лазим тирдал желбна. Адан гафаралди, аялар къулай вири шартIар авай квартирайра яшамиш хьун лазим я.

“И категориядин агьалияр таъминарзавай квартираяр законодательстводин истемишунрив кьадайбур хьун герек я. Махачкъаладин администрацияди са шумуд чка тайинарнава. Вахт тIимил ама, за и кIвалахдал машгъул руководителриз месэладив еке жавабдарвал гьиссуналди эгечIунин тапшуругъ гузва. Алай йисан эхирра аялрив цIийи квартирайрин куьлегар вахкун герек я”, – къейдна Анатолий Къарибова.

Веревирдерин нетижада аялар патал маса къачузвай квартирайриз чкадал фена килигунин къарардал атана.

Совещанидин кIвалахда РД-дин Гьукуматдин Председателдин заместителдин везифаяр вахтуналди тамамарзавайди тир – РД-дин образованидин ва илимдин министр Уммупазиль Омаровади, Махачкъала ше­гьер­дин кьилин везифаяр вахтуналди тамамарзавай Абусупьян Гьасанова, гьакIни и месэладал машгъул са жерге ведомствойрин кьиле авай ксари иштиракна.

“Лезги газет”


Всего просмотров: 21

Читайте также: