КIвалахдай чкаяр жезва

Къадим Дербентда зегьметдиз къабил агьалияр кIвалахдай чкайралди таъминарун ва гьа идалди бейкарвал тIими­ларун патал серенжемар кьабулзава. И важиблу месэла Дербент шегьер гегьенш майданра вилик­ди тухун программадин бинедаллаз гьялзава.

Кьилди къачуртIа, программади исте­миш­завайвал, эхиримжи вахтара шегьерда куьчеяр ва майданар цIийи кьилелай туькIуьр хъувунин, аялрин бахчаяр ва мектебар ремонтунин, цIийибур эцигунин, яшайишдин цIийи объектар кардик кутунин месэлаяр гьялзава, яни хъсанви­лихъ аквадай хьтин дегишвилер хьанва ва и кар  давам жезва.

Ингье анжах са шумуд мисал: “Махачкалинская”, “Казем-Бекан” ва генерал Саидован тIварарихъ галай куьчеяр, инженервилин тадаракарни кваз, тамамвилелди ремонтнава, К.Марксан, Х.Тагъиеван, Къ.Агъасиеван, Дагъустандин 345-стрелковый дивизиядин куьчейра агьалийри ял ядай скверар ва спортдин майданар арадал атанва.

Генани са артуханвал. Виликдай кIва­ла­хар, са гьихьтин ятIани себеб аваз, акъвазарнаваз хьайи “Горзеленхоз”, “Горсервис” теш­ки­латар, Жаван натуралистрин станция ва Искусствойрин мектеб арадал хкуналди, кардик кухтунва.

Шегьердин администрацияди малумарайвал, вири и серенжемри анжах 2019-йисуз Дербентда 500-дав агакьна кIва­лахдай чкаяр артухардай мумкинвал гана.

Мад са делил къейд ийин: “Дербент ше­гьер” территориальный округ гегьенш майданра аваз виликди тухун” республика­дин  программа агалкьунралди кьилиз акъу­ду­нин мураддалди 2020-йисуз 3 млрд ма­нат харждайвал я. И кардини шегьер­да кIвалах­дин чкаяр генани гзафардай мумкинвал гуда.

Къадим шегьер йисалай-суз чIехи ва авадан, ина кIвалахдай чкаярни артух жез­вай­дакай рахайла, генани са кар къейдна кIан­да. И мукьвара шегьердин кьил Хизри Абакарова ТАСС агентстводин векилдиз ха­­бар гайивал, 2023-йисан эхирдалди ше­гьер­да гьуьлуьн портни эцигдайвал я. Махсус пе­шекаррихъ галаз санал ам эци­гунал чкадин хейлин агьалиярни желбда­.

Нариман Къарибов


Всего просмотров: 42
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире