КIвалахдай алава чкаяр

18-мартдиз РД-дин Гьукуматдин Председатель Артем Здунован  регьбервилик кваз кьиле фейи совещанидал Дагъустан Республикада кIва­лах­­дин цIийи чкаяр арадал гъуниз талукь ме­­сэлаяр веревирдна. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.

 

Совещанидал къейд авурвал,  республикада­  кIвалахдин чкайрин кьадар  промышленный паркар  арадал гъунин ва кардик кутунин, инвес­т­проектар кьилиз акъудунин, Каспийскда яша­йиш­динни экономикадин жигьетдай гзаф йи­гиндаказ вилик фидай мулк гегьеншарунин, “КИППpoмКаспий” индустриальный паркуна кIва­лахдин цIийи чкаяр тешкилунин гьисабдай артухарун фикирдиз къачунва.

Идалайни гъейри, 2019-йисуз республикадин инвестпрограммадиз чара ийизвай пулдин такьатар артухарунин гьисабдай эцигунрин кIва­лахрин, талукь тирвал, ишлемишиз вахкузвай объектрин кьадарар пуд сефердилайни гзаф  артух жеда. Идан гьисабдай кIвалахдин цIийи чкаярни пайда жеда.

“Чи министрри чпин гъилик квай хилера госу­дарстводин программаяр кьилиз акъудунин гьи-саб­дай кIвалахдин гьикьван чкаяр арадал гъи­датIа, гьа кардиз за итиж ийизва”, — лагьана Артем Здунова, совещанидин иштиракчийрихъ элкъвена.

РД-дин тIебиатдин ресурсрин ва экологиядин министр Набиюлла Къарачаева малумарайвал, кардик квай карьерра алай йисан 1-январдилай кIвалахдин цIийи 200 чка арадал гъана: “Налогрин инспекцияди и делилар керчекбур тирди тестикьарда. И барадай тухузвай кIвалах акъвазарнавач, мадни кIвалахдин цIийи 500 чка арадал гъун пландик кутунва”.

Совещанидал рахай РД-дин туризмдин ва халкьдин художественный сеняткарвилерин рекьяй министр Расул Ибрагьимова малумарайвал, алай йисуз инвестпроектар кардик кутунин сергьятра аваз 700-лай виниз кIвалахдай гьамишалугъ чкаяр ва 2 агъзурдалай виниз вахтуналди тир чкаяр тешкилда.

Республикадин мулкунал “Земский духтур” ва “Земский фельдшер” программаяр кьилиз акъудзавай гьалдиз талукь малумат РД-дин здравоохраненидин министр Жамалудин Гьажиибрагьимова гана.

Совещанидал са жерге маса министерствойрин ва ведомствойрин регьберарни рахана.

Мярекатдин нетижаяр кьур Дагъустандин Гьу­куматдин Председателди инвесторрихъ галаз  сих алакъаяр хуьн чарасуз тирди къейдна. “Абурухъ галаз кIвалах твах. Кар-кеспидал маш­гъул жедай цIийи чкаяр пайда жедайвал, абу­руз гьикI куьмек гудатIа веревирд ая.  Гьихь­тин­ инвестпроектрихъ галаз алакъалу яз кIва­лах­дин алава чкаяр арадал гъиз жедатIа, гьа кардай кьил акъуд­. Им чун патал важиблу кар я”, — къейдна республикадин премьер-министрди.

«Лезги газет»


Всего просмотров: 25

Читайте также: