Кьилиз акъуднава

“Зи Дагъустан — Шегьердин къулай шартIар”

18-декабрдиз Дагъустандин Кьил Владимир Ва­сильев Табасаран районда  Кьиблепатан мулку­нин округдин векилрихъ галаз гуьруьшмиш хьайи вахтунда “Зи Да­гъустан — Шегьердин къулай шар­тIар­” проектдин жемятдин патай координатор Ру­къи­ят Агьмедовади округда ам уьмуьрдиз куьчуьрмишзавай тегьердикай суьгьбетна.

Программадин сергьятра аваз  ина агьалияр патал туькIуьрзавай  47 чкада,  санлай къачурла, 167 647 400 манатдин харжияр авуна, аваданламишунин кIва­лахар кьиле тухузва.

Проект Дагъустандин Огни ва Дербент шегьер­ра, гьакIни Агъул, Ахцегь, Дербент, Докъузпара, Къай­­тагъ, Мегьарамдхуьруьн, Сулейман-Сталь­ский ва Табасаран районра  кьилиз акъудзава.

Къейдна кIанда хьи, объектрин асул пай акьал­тIарнава. Мукьвара гьакIни Дербент ва Докъузпара районра авай объектар ишлемишиз вахкуда.

Чара авунвай пулдин такьатар дараматрин винел патар ремонт авуниз, и да­ра­матрин патарив гвай чкаяр, гьакIни центральный куьчеяр аваданламишуниз, яхдиз физвайбур патал зулар, паркар, май­да­­нар­ туькIуьруниз ва шегьре рекьерин къерехринбур тушир чкайра эквер туниз, гьакI­ни архитектурадин гъвечIи кIа­лубар арадал гъуниз­ харж авун фикирда кьунвай.

Санлай къачурла, КГС (шегьердин къулай шар­­тIар) программадин сергьятра аваз  республи­кадин 49 муниципалитетда 228 проект кьилиз ­акъудна.

Докладдин эхирдай Рукъият Агьмедовади къейд авурвал, вири объектар — гьам гьаятар, гьамни агьалийрин гегьенш къатари ишлемишзавайбур — жемият желб авуналди  вахкузва.

Владимир Васильева и кIвалахрикай гьар садав кьетIендаказ эгечIунин ва­жиблувал къейдна. Идалайни гъейри, ада агъ­сакъалриз санал кIва­лахуниз эвер гана,и ва я маса месэла гьялунин жигьетдай абурун теклифар кваз кьадайдакай кье­тIен­даказ лагьана.

“Зи Дагъустан — Зи яд”

Дагъустандин Кьил Владимир Васильев Табасаран районда Кьиблепатан мулкунин округдин  агъсакъалрин советдин векилрихъ  галаз гуьруьш­миш хьайи вахтунда дагъустанвийрин яшайишдин ерилувал артухарунин, шартIар хъсанарунин  месэлани хкажна.

Кьилди къачуртIа, “Зи Дагъустан”  тIвар ганвай­ проектар кьилиз акъудзавай гьалдикай рахана.

ИкI, республикада целди таъминарунин кIва­лах хъсанарунин месэла гьялзавай тегьердикай “Зи Дагъустан — Зи яд” проектдин жемятдин патай координатор Анна Безруковади суьгьбетна. Ада къейд авурвал, проект уьмуьрдиз куьчуьрмишунал жемятдин патай гуьзчивалдайбур, депутатар ва эцигунрин кIва­­лахар ерилудаказ тамамаруниз итиж ийиз­вай адетдин агьалияр  желбнава.

Идалайни гъейри,  координатордин гафаралди, и рекье талукь министерствойрихъ галаз сихдаказ санал кIвалахзава, чкайрал физ, ахтармишунар ийизва.

“Зи Дагъустан — Зи яд” проектдин сергьят­ра аваз за республикада эцигзавай целди таъминарунин 48 объ­ектдал кIвалахар кьиле­ тухузвай гьал ахтармишзава. Абурукай 9 объект (562 миллион манатдин къимет авай) Кьиблепатан мулкунин округда эцигза­ва. Кьиб­лепатан округдик и проект уьмуьрдиз­ куь­чуьр­­миш­завай 7 муниципалитет акатзава: Дахадаев­, До­къузпара, Къайтагъ, Кьурагь, Сулейман-Сталь­ский, Табасаран ва Хив районар”, — лагьана ада.

А.Безруковади кIватI хьанвайбурун фикир дагъ­лух чкада эцигунрин кIвала­хар тамамарунин мура­кабвилел желбна. Идахъ галаз сад хьиз ада эци­гу­­нардайбуруз сагърай лагьана ва алава хъувуна: “Дагъдин чкайра хуьрерин адетдин агьа­лий­рини эцигунардайбуруз вири патарихъай куьмекар гузвай. Гьа и кар себеб яз чи проектриз халкьдинбур лагьанва”.

Эхирдай Анна Безруковади къейд авурвал, рес­публика виликди тухунихъ элкъуьрнавай “Зи Да­гъустан” проектри цIуд йисаралди гьялиз та­хьан­вай са жерге месэлаяр гьялдай мумкинвал  гуда.

Владимир Васильева проектар кьилиз акъуддайла рехъ ганвай гъалатIар кваз кьун ва лазим серенжемар кьабулун герек тирдакай лагьана.

“Зи Дагъустан — Зи рекьер”

Дагъустандин Кьил Владимир Васильев Табасаран районда Кьиблепатан мулкунин округдин  агъсакъалрин советдин векилрихъ  галаз гуьруьшмиш хьайи вахтунда рекьерин ери хъсанарун патал гъиле кьунвай “Зи Дагъустан — Зи рекьер” проект уьмуьрдиз куьчуьрмишзавай гьалдикайни лагьана.

Мярекатдин иштиракчийрин вилик проектдин жемятдин патай координатор Мугьамед Рашидов рахана. Ада хабар гайивал, къенин юкъуз РД-дин Кьили вилик эцигнавай месэла гьялнава ва проект саки кьилиз акъуднава лагьайтIа жеда. Амайди анжах документациядихъ галаз алакъа­лу месэлаяр я.

“Дагъустанда сифте сеферда яз кIватI­­навай транспортдин налогдин та­кьатар шегьре рекьер ремонт авуниз серфнава. Республикадин 49 муниципалитетда ва шегьеррин округра 179 объект эцигнава. Им лагьайтIа, 149 км рекьин мензил я. 2019-йисав гекъигайла, 2020-йис патал транспортдин налог яз кIватI­дай пулунин кьадар гзаф хьанва.Им Дагъустанда алукьдай йисуз чаз гьакьван лазим тир хатасуз ва ерилу рекьер вилик квай йисан кьадардилай 62 процентдин гзаф туькIуьрда лагьай чIал я”, — лагьана ада.

Кьиблепатан мулкунин округдикай рахадайла, Мугьамед Рашидова хабар гайивал, ина, проектдин бинедаллаз, санлай къачурла 76 677 100 манатдин къимет авай 45 объект эцигнава.

“5 объект Дагъустандин Огни шегьер­да­ ава, амайбур — Агъул, Ахцегь, Дербент, Да­­хадаев, До­къузпара, Къайтагъ, Кьу­рагь­, Мегьарамдхуьруьн, Рутул, Сулейман-Стальский,  Табасаран  ва Хив рай­онра”, — къейдна ада.

Владимир Васильева Мугьамед Рашидоваз ва и кIвалахрал машгъул маса координаторриз сагърай лагьана. Гьа са вахтунда ада республикада жемятдин  патай гуьзчивал авунин къайда арадал хквезвайдакай лагьана — инсанри чпин ­ху­шуналди халкь, жемят патал хийирлу кIва­­ла­хар­ авун. Ада проектар ерилудаказ кьилиз акъудунай жавабдарвал и  кIвалахда иштиракай гьар са касдин хиве авайди къейдна. Идалайни гъейри, алай йисуз кIватIнавай транспортдин налогдин кьадар гзаф хьуни, РД-дин Кьилин гафаралди, хъсан па­тахъ мадни еке дегишвилер хьунал гъида.

«Лезги газет»


Всего просмотров: 88
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире