Къени краралди тафаватлу я

Алай девирда гьар са лезги хуьряй пата-къерехда намуслувилелди зегьмет чlугвазвай, чпин тlварар маса миллетризни сейли хьанвай рухваяр чахъ тlимил авач. Ахьтинбурукай сад Докъузпара райондин Усугъчайдилай тир Гьажиев  Сарухан  Гьажиевич  я.

Сарухан 1971-йисан 28-июлдиз Усугъчай хуьре дидедиз хьана.  1988-йисуз ина юкьван школа акьалтlарна. 2003-йисуз Сарухан Гьажиев Дагъустандин политехнический институтдин эцигунардай факультетдиз гьахьна.

2004-йисуз С.Гьажиева Махач­къа­лада вичин хсуси эцигунардай  “Сократ” кархана арадал гъана. Къенин йи­къалди ада меркезда ва адалай къе­рехра ийизвай эцигунрин ва ремонтдин кlвалахар хъсан еридинбур я. Кьилди къачуртlа, “Сократ” фир­мадин кол­лективди РД-дин милли си­я­сат­дин ва къецепатан ала­къайрин рекьяй министерстводин “Соколенок” типографияда ремонтдин кlвалахар кьиле тухвана. (А чка, цIун ялаврик акатна, канвай). Къе ам мешребдиз хканва, кардик ква. Тlвар кьунвай фир­мади республикадин мектебар датlана ре­монтзава, эцигунрин кlва­лахар кьиле тухузва. “Сократ” карханадин кол­лективди УФСИН-дин яшайишдин кlвалерин дараматда ремонтдин кlвалахар кьиле тухуз­ва­. “Спецгазстройсервис”, “Росстат”, “Русгидро” тешкилатрани кlва­­­лахна, ГЭС-рални ремонтдин кlва­лахар кьи­ле тухвана. Алай вахтунда фирмадин коллективди республикадин МЧС-дин пожарный частара ремонтдин ва эцигунрин кlвалахар тамамарзава.

Сарухан Гьажиеван карханадал “Сократ” тlвар хьунихъни вичин тарих ава. Адан чlехи стха, усугъчайви  Сократ Гьажиев Афгъанистандин дяведин иштиракчи, “Яру гъед” ордендин сагьиб, вахтсуз телеф хьайи къагьриман я. Адан тlвару­нихъ Усугъчай хуьре куьче, СОШ-дин пионеррин тешкилат янава.

Сарухан Гьажиева Сократ Гьажиев рикlел хуьниз талукьарнавай спортдин турнирар — азаддиз кьуршахар кьунай, волейболдай, футболдай — Кьиблепатан Дагъустандин пагьливанрин иштираквал авай спортдин мярекатар тешкилзава. С.Гьажиева районда спорт ви­лик тухун, жегьилар спортдал желб авун патал къени кlвалахар, мер­гья­матлу крар ийизва. Адан къаюм­ви­лик кваз Кьиблепатан Да­гъус­тандин хуьрерай тир пагьливанри Россиядин, Европадин чемпионатра иштиракзава.

2018-йисуз Цlийи Къаракуьредин спортдин дворецда  Сарухана азаддиз кьуршахар кьунай Дагъус­тандин пагьливанрин чемпионат кьиле тухвана­. Акъажунра Дербент, Дагъустандин Огни шегьеррин, ви­ри лезги районрин 150 спортсменди иштиракна. Акъажунрин спонсор Сарухан Гьажиева вичин патай жегьил пагьливанриз — 1-чка кьурбуруз — 3000 манат, 2-чкадал хьайибуруз  — 2000 манат, 3-чка кьурбуруз са агъзур манатдин кьадарда аваз руьгьламишдай пишкешар гана. Чемпионатдин иштиракчийриз пулсуз тlуьнар гунни тешкилна.

Къени ва жумарт ватанэгьли, мергьяматлу кас Сарухан Гьажие­ва­ кьилиз акъудзавай крарин сиягь гегьеншди я. Ада вичин диде, буба, стха фаракъатнавай Усугъчайдин сурара чIимел гьавадикай далда кьадай кьур эцигна, аниз яд гъана. “Межид убада” авай кьвед лагьай сурарани адаз кьур туькIуьриз ва аниз яд гъиз кlанзава. Хайи хуьруьн агьалийрин яшайишдин шартlар къулай хьун патал Саруха­нахъ мадни фикирар ава. Къуй абур кьилиз акъатрай!

Аллагьди къуват гурай ви къени крариз.

Къарагъзавай инсан я вун галаз ярарихъ.

Гьар са карда мягькем хьурай ви гьевес, илгьам,

Рикlин шадвал галаз хьурай,  уьмуьрни — сагълам.

Шагьбала Шагьбалаев


Всего просмотров: 98

Читайте также: