Кьегьалвиликай ктаб

Махачкъаладин “Алеф” издательствода террориствилин гьерекатдин вилик пад кьадай вахтунда телеф хьайи Россиядин хатасузвилин фе­­­де­ральный къуллугъдин капитан  Артур  Ба­ба­еван кьисметдикай  Руслан Герееван  хроникадинни биог­рафиядин очерк-ктаб акъатнава.  Ам Дагъустан Республикадин же­гьилрин арада экстремизмдин ва терроризмдин идеологиядиз аксивалдай комплексный программадин сергьятра аваз жегьил­рин крарин рекьяй минис­терстводин грантдин гьисабдай чапнава.­

Автор, Кеферпатан Кавказдин исламдин ахтармишунардай центрдин ди­­ректор Р.Гереева къейд авурвал, ктабдикай агьалий­риз ватанпересвилин­ тер­бия гузвай хилен къуллугъчийривай, аспирантривай, студентривай­, кIел­­­завайбурувай ва гьакI масабурувайни менфят къачуз жеда. Адахъ ва­­­­­танпересвилин тарсар­ тухуниз куьмекдай шикилар, видеоматериалар, сце­нарияр ва Артур Бабаеван игитвилиз талукь ролик авай дискни гилиг­нава­.

Р.Гереева рикIел хкайвал, маса ксарин уьмуьр хаталувиликай хуьн патал вичин чан къурбанд авур Артур Бабаев хьтин игитар къвезмай несилриз чешне яз къалурна кIанда.

Россиядин ФСБ-дин Дагъустан Республикада авай управле­нидин экс­перт-взрывотехник  Артур  Амирханович  Бабаева  гъили авунвай 43 ва хъит­кьиндай пара хаталу 38 шей хатасуз авуна. Адан алахъунар ва алакьуна­р­  себеб яз, гзаф инсанар телеф хьунал гъидай терактрин вилик пад кьуна­. Эхиримжи дуьшуьшда 2009-йисан 2-июлдиз ракьун рекьин “Уйташ” переезддин мукьварив ракьун рекьик кутунвай хъиткьиндай шей хатасуз ийидай вахтунда Артур Бабаев телеф хьана.

Вичин къуллугъдин везифаяр кьилиз акъуддайла, чанни гьайиф татана, цIудралди инсанар хаталувиликай хвейи капитандин тIвар тарихда эбеди яз кхьенва лагьайтIа жеда.

Президент В.Путинан Указдалди Артур Бабаеван игитвал, (телеф хьайидалай кьулухъ) “Жуьрэтлувиляй” ордендалди къейдна.

Чи мухбир


Всего просмотров: 39

Читайте также: