Къазахстандай — гъалибвал гваз

Са шумуд югъ идалай вилик Къазахстандин Тараз шегьерда (советрин девирда — Джамбул), “Тараз Арена” спортдин комплексда, азаддаказ кьуршахар кьунай Динмугьамед Канаеван экуь къаматдиз  бахшнавай международный VII турнир кьиле фена.  Ана Россиядин хкянавай командадик кваз дагъустанви са шумуд спортсмендини гьасиррал чпин алакьунар къалурна. Нетижада чи спортсменри  кьвед къизилдин ва кьведни гимишдин медалар къазанмишна. Абурун арада чи ватандаш маш­гьур спортсмен  Даурен  Куругълиевни  ава. Мубаракрай!

Турнирда ада 86 кг-дин заланвал авайбурун арада чкадин (гьасиррал адахъ галаз экъе­чIайбур вири къазахар тир) 4 спортсмендихъ галаз вичин къуватар ахтармишна. ИкI, 3 бягьс инанмишвилелди гъалибвал къазанмишуналди (25:0 гьисабдалди) акьалтIарай Д.Куругълиев финалда Азамат Даулетбеговахъ галаз “гуьруьшмиш хьана”. Эхиримжи декьикьада Д.Куругълиева къазах спортсмен кIаник кутуна, бягьс вахт куьтягь жедалди акьалтIарна.

Турнирдин спонсоррин патай къизилдин медалриз лайихлу хьайи спортсменриз гьар садаз — 4000, гимишдин медалрин сагьибризни гьар­даз 2000 доллар гана.

«Лезги газет»


Всего просмотров: 82

Читайте также: