Ислам

Къастунал кIеви кьве стха

Сургутда гзаф лезгияр яшамиш жезва. Абур гьар жуьре кеспийрал машгъул я, къуллугърал ала. Сургутда авай чи ватан­даш­рикай сад ХМАО-да кудодин федерациядин регьбер Ислам Рамазанов я. Сулейман-Стальский райондин Эминхуьряй тир Ислама ва адан стха, панкратиондай, армейский къайдада гъилералди кукIунай, 2 сеферда кудодай Россиядин чемпион, кудодай 3 сеферда Россиядин кубокдин, кудодай дуьньядин  кубокдин, чIулав чIулунин сагьиб, женгинин самбодай междунар­одный акъа­жунрин гъалибчи, са шумуд жуьредай  спортдин мастер, кудодай международный классдин мас­тер Мусади регионда кудо вилик тухуник лайихлу пай кутазва. ГъвечIи стха Му­са алай вахтунда МММ-дал маш­гъул я, агалкьунарни къазанмишнава.

Ислама цIи Москвада кудодай кьиле фейи Россиядин чемпионатда гимишдин медаль къачуна. Спортдин и жуьредал машгъулбуру, тренерри къейдзавайвал, Ислам Рамазанован  гимиш къизилдив барабарди я. Чи спортсмендихъ къизилдин медаль къачудай вири мумкинвилер авай, амма виликрай хьанвай тIарвили вичикай хабар гана.

РикIел хкин, са шумуд йис идалай ви­лик тренировкайрин вахтунда хьайи тIарвал себеб яз Ислам Рамазановавай неинки акъажунра иштиракиз, бягьсерин майданрал  экъечI техжез вад йисалай гзаф вахт тир. Сагъламвал пайгардик кухтур пагьливан патал акъажунра иштиракиз га­тIум хъувун регьят месэла тушир. Ярар-дустарин, тренеррин куьмекдалди арадиз хтай Ислам Рамазанова 2016-йисуз Нижний Новгородда кудодай кьиле фейи акъа­жунра Россиядин кубок къазанмишнай. Ам Ис­ламан киседа Россиядин пуд лагьай­ кубок тир. ГьакIни Ислам Рамазанов Европадин, дуньядин чемпионатрин медалрин сагьиб я.

Москвада кьиле фейи акъажунра тIарвили вичикай хабар хгана­чиртIа, Ислам нубатдин къизилдин медалдин са­гьиб­ жедай.

– И акъажунрин финалда захъ галаз экъечIайди регьят спортсмен тушир, йис вилик ада дуьньядин кубок къачунай. Финалдилай вилик захъ пуд бягьс авай. Абур за вахтунилай фад – гъалибвал къазанмишуналди акьал­тIар­на. Гьайиф хьи, финалдин бягьсина кIандайвал хьанач. Вахтунилай фад куьтягьда лагьана фи­кир­навай­тIани, галатунилай гъейри, тIар­вили хабар хгана, са юкъуз ам кьуд лагьай бягьс тир, – къейдзава Ислам Рамазанова.

Муса

Амма финалдин къугъунрилай гъейри, сургутви Исламахъни ва гъалибвал къазанмишай Нижний Новгороддай тир спортсмендихъни медалрилай, кубокдилай ва маса шабагьрилай гъейри, спортдин и жуьредай Россиядин хкягъай командадик акатдай мумкинвал хьанва. И вацра Обнинскда кьиле фидай сборрал зулухъ Японияда жедай дуь­ньядин чемпионатда кьве пагьливандикай ни чи уьлкведин патай иштиракдатIа тайин жеда.

Къейд ийин, чи уьлкведа кудодай сифте секция Сургутда пайда хьана. Гуь­гъуьн­лай, Ислам Рамазанова субутза­вай­вал, и школа неинки Россияда ва дуь­ньядани тарифлу­бурун жергеда гьатна. Къе 33 йиса авай пагь­ливандин вилик неинки акъа­жунра иш­тиракунин, гьакI тешкиллувилин месэла­яр­ни ква. Алатай йисан декабрдин вацра ам кудодай округдин федерациядин кьиле акъ­вазарнава. Спортдин и жуьре патал ре­­г­и­онда ва уьлкведа авай месэлаяр, четинвилер ва мумкинвилер адаз хъсандиз чизва­.

– Алай вахтунда спортдин и жуьредал машгъул жез кIанза­вай ашкъи авайбур гзаф ава, аялрилай эгечIна. Кудо кIан­за­ва, вучиз ла­гьайтIа им итижлу, тIи­мил тIарвилер жедай спортдин жуьре я. Неин­ки Сургутда, ХМАО-да тренерар къуватлубур, гьакIни чпин кар чидайбур я, ина вердишвилер къачузвай жегьилри хъсан нетижаярни къалурзава, – алава хъувуна Ислам Рамазанова.

Чаз Ислам Рамазановахъ чандин сагъ­ламвал хьана, Россиядин хкягъай командадик кваз Японияда ада гъалибвал къазанмишна кIанзава.

Дагъви Шериф


Всего просмотров: 19

Читайте также: