Каспийскда — цIийи 2 школа

КIелунин цIийи йисан сад лагьай юкъуз, 2-сентябрдиз, Каспийскдин 13-нумрадин 800 аялдиз чкаяр авай  умуми образованидин юкьван школа ачухуниз талукь шад мярекатда Дагъустандин Кьил Владимир Васильева, РД-дин Гьукуматдин вице-премьер Уммупазил Омаровади,  Каспийскдин мэр Мегьамед Абдулаева ва масабуру иштиракна.

Школа эцигунив алатай йисуз “РФ-дин агьалияр тIем акакьдай къиметрай къулайвилер авай яшайишдин кIвале­ралди ва коммунальный къуллугъралди таъминарун” госпрограммадин сергьятра аваз гатIунна. Къенин юкъуз школа лазим тир вири тадаракралди таъмин я, патарив гвай чкаярни къулайдаказ туь­кIуьрнава.

Шад мярекатдин иштиракчийрихъ ­элкъвена рахай Дагъустандин Кьил В.Васильева, образованиди инсандин уьмуьрда къугъвазвай роль важиблуди тирди къейд авуналди, Чирвилерин югъ теб­рикна.

— Къе чна квехъ галаз санал 800 аялдиз чкаяр авай цIийи мектеб ачухзава. И декьикьайра образованидин мад 4 идара —  мадни сад Каспийскда, гьакIни Кумторкъала райондин Коркмаскъалада, Кьиблепатан Сухокумскда, Бабаюрт райондин Новокареда ачухзава. Школаяр эцигунин кIвалахар тешкилай ва абур кьилиз акъудай вири ксариз, муаллимрин коллективриз ва диде-бубайрин комитетриз и мярекат халис сувариз элкъуьрунай сагърай лугьуз кIанзава. И школа ачухуни шегьер­дин амай школайрилай пар алудиз куьмекда. Ам чирвилер гудай цIийи такьатралди, предметрай кабинетралди таъмин я. Чи аялри хъсан образование къачун па­тал чна инлай кьулухъни шартIар тешкилда, — къейдна субъектдин кьили.

Владимир Васильев чи республикада агалкьунралди кьилиз акъудзавай “100 школа” ва “150 школа” проектрикайни, абурун бинедаллаз виликдай пландик кутур 250-дан чкадал 334 школа ремонтнавайдакайни рахана. Ада къейд авурвал, кьиле тухузвай кIвалахрик чпин лайихлу пайни кутур мергьяматлу ксар май­дандиз экъечIуни хъсан нетижаяр къа­занмишиз куьмекна. Школа гьихьтинди хьайитIа, хуьруьн, райондин ва республикадин агьа­лийрин гележегни гьахьтинди жеда лагьай­ фикир раижна региондин Кьили.

Республикада хъсан патахъ хьанвай дегишвилерикай рахадайла, Владимир Васильева алай вахтунда школаяр лазим тир кIелунин вири пособийралди таъмин тирди, ЕГЭ-дай хъсан нетижаяр къазанмишиз алакьнавайди, региондин яргъал тир районра образованидин ери хъсанарунин мураддалди Дагъустан, уьлкведа сифегьанбурун жергедай яз, “Хуьруьн (земский) муаллим” проект уьмуьрдиз ке­чирмишунив эгечIнавай­дини  къейдна.

Школайра кIелзавай аялрихъ агалкьу­нар хьана кIанивилин келимаяр лагьайдалай кьулухъ Дагъустандин Кьили чи аял­­риз гьам хуьре, гьам посёлокда, гьамни меркезда чирвилер къачун патал сад хьтин мумкинвилер яратмишун патал вири шартIар тешкилдайдахъ инанмишарна.

КIватI хьанвайбуруз шегьер патал лишанлу и югъ Каспийскдин мэр Мегьамед Абдулаевани тебрикна.

— Къе Каспийскда 16 агъзурдалай виниз аялар партайрихъ ацукьда. ЦIийиз ачухзавай мектебдиз 830, гьа гьисабдай яз 1-классдиз физвай 280 аял кьабулнава­. Образованидин къурулуш вилик тухун — им чи шегьерди Дагъустандин ва Рос­сиядин гележегдик кутазвай пай я, — къейдна ада.

Шад мярекатдилай кьулухъ В.Ва­силь­ев школадин дараматриз тамашна, сиф­те яз школадиз атанвайбурун тарсуниз фена, аялрихъ галаз рахана, гележегда абуруз гьихьтин пешейрин иесияр жез кIанзаватIа хабарар кьуна, кIелунра агалкьунар хьун алхишна.

* * *

Каспийскдин 12-нумрадин юкьван школа ачухуниз талукьарнавай шад мяре­катда РД-дин Гьукуматдин Председателдин Сад лагьай заместитель Анатолий Къарибова, Дагъустандин ЖКХ-дин ва эцигунрин министр Малик Баглиева, Каспийскдин администрациядин кьилин сад лагьай заместитель Загьирбег Таибо­ва, шегьердин образованидин управленидин векилри ва масабуру иштиракна. ЦIийи школадин дарамат ачухун лишанламишзавай яру лент атIун А.Къарибовал ихтибарна.

Омарован куьчеда цIийи школа эцигунин лазимвал фадлай авай. КIелунин и идаради шегьердин 3 сменада кIвалаху­низ мажбур хьанвай амай школайрилай пар алудда.

— ЦIийи гьар са школа чи саналди тир еке агалкьун ва гележегдик еке пай кутун я. Бес къенин аялар чи республикадин ге­лежегдин агьалияр я эхир, абурун гуь­гъуь­нин гьар са несилдиз хъсан образование гун чи кьилин везифайрик акатзава. За квез лишанлу и вакъиа рикIин сидкьидай тебрикзава ва  кIелунин цIийи йисуз квехъ агалкьунар хьана кIанзава, — лагьана, кIватI хьанвайбурухъ элкъвена, А.Къарибова.

Лишанлу вакъиа Загьирбег Таибовани­ тебрикна. Са йисуз шегьерда цIийи кьве  шко­ла ва аялрин бахча ачухун шегьердиз­ ва агьалийриз еке савкьат тирди, цIийи идаради 500-далай виниз аялриз чир­вилер къачудай мумкинвал гузвайди къейдна­.

Чирвилерин йикъаз талукьарнавай концертди кIватI хьанвайбурун гуьгьуьлар мадни хкажна.

«Лезги газет»


Всего просмотров: 76

Читайте также: