Къадим шегьердин югъ

16-сентябрдиз  Дербент  шегьердин югъ шад гьалара, сувар хьиз къейд­­на.

Сятдин кIуьд. Азадвилин майдандал хуь­руьн майишатдин продуктрин ярмаркади кlва­лахиз башламишна. Чи фикир Дербент райондин “Татляр” агрофирмади гъанвай суьрсетди вичел желбна. Агьалийри хушвилелди ципицlар, ичер, афнияр маса къачузвай. Чунни къереда акъвазнач, хъсан еридин ва хейлин ужуз салан майваяр, емишар къачуна. Муьштерийриз гьар жуьредин вир­тlер, ширинлухар, колбасаяр ва маса шейэрни маса гуз­вай­.

Шадвилер шегьердин пуд чкадал кьиле фена. Женгинин баркаллувилин паркуна школайрин, колледжрин аялри ва жаванри гьазурнавай шейэрин выставкайри бегьем­ чка кьунвай.Инал чун 14-нумрадин школадин ди­ректор Фазил Алимовахъ галаз таниш хьана­. Сада-садаз сувар  мубарак авурдалай гуьгъуьниз ада чун аялри ва муаллимри гьазур­навай экспонатрихъ галаз танишарна.  Баркалла, абуру пара гуьрчег шейэр гьазурнавай…

Паркунин агъа кьиле Лезги театрдин ва музыкадин училищедин коллективри тамамарзавай шад авазризни манийриз яб гуз, гзаф инсанар кlватl хьанвай…  Стlал Сулейманан паркуна спортсменри чпин алакьунар къалурзавай. Ина спортдин са шумуд жуьре­дай акъажунар кьиле фена. Яшлубуруз шашкайрал, нардрал ва шахматрал къугъ­ва­дай шартlар тешкилнавай. И паркуна авай халкьарин адетрин культурадин центрада жаван артистри чпин алакьунар къалурзавай.

Лезги театрда аялриз ва абурун диде-бубайриз “Аленький цветочек” тамаша пулсуз къалурна. Ина ая­лар машгъулардай аттракционни кардик квай…

Сятдин цIусад. Кьилин шадвилер женгинин баркаллувилин паркуна башламиш хьана.  Анин кьилихъ галай майдандал шегьерэгьлияр, патарив гвай хуьрерай атанвай агьалияр, шегьердин идарайрин, карханайрин коллективар, махсус парталар алай “Юнармиядин” иштиракчияр, шегьердин кадетрин корпусда кIелзавайбур, школайрин му­аллимар кlватl хьанва. Ина гьакlни Да­гъус­­тандин телеканалрин, республикадин милли чlа­ларал акъатзавай газетрин ва гьакl­ни шегьерринни районрин массовый такьатрин журналистри ва корреспондентрини иштиракна.

Майдандал Дербентдин кьилин везифаяр вахтуналди тамамарзавай Энрик Муслимов кьиле аваз шегьердин руководство, РД-дин Халкьдин Соб­ра­ни­­дин ва шегьердин собранидин депутатар, кар­ханайрин руководителар ва масабур атана­.

– Дербент шегьердин гьуьрметлу агьалияр, багьа мугьманар! Квез чи виридан сувар – Дербентдин югъ рикlин сидкьидай мубаракрай, – гафаралди мярекат Э.Муслимова ачухна. – И сувари, яшариз, миллетдиз, дин­диз, пешекарвилиз  килиг тавуна, чун вири сад-садав агудзава. Чна чи шегьердин кье­тlенвилел, адан тикрар тежедай акунрал дамахзава. Чун ам агалкьунралди, бахтлуда­каз мадни вилик фидайдахъ инанмиш я.

Дербент йикъалай-къуз гуьрчег ва авадан жезва. Шегьердин мулкар  хъсандиз дуьз­мишунин кlвала­хар галай-галайвал кьиле тухузва. Дербентвийрин уьмуьр къулайди ийидай, шегьер гуьрчегардай проектар уьмуьрдиз кечирмишзава. И важиблу кардик дербентвийри чпин  бажарагъдалди, зегьметдалди еке пай ку­тазва. Квехъ мягькем сагъламвал, яратмишунра ва зегьметда­ агалкьу­нар, бахтар хьун зи мурад я.

Ахпа Энрик Муслимова ва шегьердин депутатрин собранидин председатель Мавсум Рагьимова кадетрин са дестедихъ галаз “Яс чlугвазвай дидедин” памятникдал цуькверин тажар эцигна.  Аялри, дуствилинни садвилин лишан яз, чпин гъилера авай гьар жуьредин рангарин шарар цавуз ахъайна.

Инал цlийи кlелдай йисуз Дербентдин кадетрин корпусдиз кьабулнавай 70 аялдини кадетвилин присяга кьабулна. Абуруз уьмуьрда  рикlел аламукьдай  и шад вакъиа кадетрин корпусдин директор, полковник Максим Эминова ва Энрик Муслимова мубаракна.

Нянин сятдин вадаз Азадвилин майдандал шегьерэгьлийриз чlехи концерт къалурна. Ам кьуьлердай “Гюнеш” ансамблди ачухна. Манийрин арайра  Москвадай атанвай дизайнерри Кавказдин халкьарин милли парталрин выставка къалурна. Ахпа сегьнедиз Бакудай атанвай кьуьлерин ансамбль экъечlна.  Концертдин программа Дагъустандин ва Дербент шегьердин машгьур­ манидарри кьве сятда давам хьайи концертдалди акьалтlарна.

Суварин мярекатар хважамжамдин рангарин салют гуналди агална.

Къагьриман Ибрагьимов


Всего просмотров: 28

Читайте также: