Йисан эхирдалди акьалтIарда

Республикадин  кьуд райондик  акатзавай Мегьарамдхуьр-Ахцегь-Рутул шегьре ­капитальнидаказ ремонт авун “Автомашинрин хатасуз ва еридин рекьер” милли проектдин лап кар алай объектрикай сад я. 

Мегьарамдхуьруьн, Докъузпара, Ахцегь ва Рутул районрин хуьруьн майишат ва туризмдин мумкинвилер вилик тухун патал и шегьредихъ кьетIен метлеб ава.  Ибурухъ галаз сад хьиз, и рекьи уьлкведин кьиблепатан сергьятдал алай пограничный заставайрихъ галазни датIана герек алакъа хуьниз куьмек гузва.

Ремонт авурдалай гуьгъуьниз Мегьарамдхуьр-Ахцегь-Рутул шегьре йисан гьи вахтунда хьайитIани ишлемишдай ва хатасуз, виниз тир еридин рекьиз элкъведа. Къенин йикъалди  асфальтдин са къат тунва, устIарар ва пешекарар кьвед лагьай къатни тунал машгъул я. Шегьредин  къерехра хатасузвал хуьдай имаратарни эцигна куьтягьнава. Асфальт, мягькемди авун патал къатарин юкьва геосинтетикадин сетка твазва.

Икьрарда къалурнавайвал, яргъи рехъ ремонт авунин кIвалахар алай йисан декабрдин эхирра акьалтIарун лазим тир. Кьилиз акъуднавай крар фикирда кьурла, рехъ вахтундилай вилик, октябрдин вацра, ишлемишиз вахкудайвал я.

«Лезги газет»


Всего просмотров: 63

Читайте также: