Ильман Алипулатов хкяна

РД-дин здравоохраненидин минис­терстводин патав гвай Общественный советдин кьиле Вирироссиядин халкьдин фронтдин (ВНФ) сопредседатель, РД-дин Общественный палатадин член,  Россиядин “Медиасоюздин” Дагъустандин отделенидин председатель  Ильман  АЛИПУЛАТОВ  тайинарнава.

Алай йисан 9-августдиз винидихъ тIвар кьунвай министерствода кьиле фейи сечкийра вирида рейсадвилелди сесер гуналди ам председателвиле хкяна. Гьа и юкъуз Дагъустандин здравоохраненидин министр Жамалудин Гьажиибрагьимован ва РД-дин Общест­венный палатадин председатель Абдулгьалим Мачаеван иштираквал аваз сад лагьай заседание кьиле фена. Анал министрди здравоохраненидин хел виридалайни гзаф месэлаяр авайди, гьа са вахтунда виридан къуватар сад авуналди са шакни алачиз  хъсан патахъ дегишвилер арадал гъиз жедайди, кьилинди и хиле йигин еришралди кIвалахун герек тирди къейдна.

ЦIийи председатель вичин нубатдай яз Общественный советдин кар алай месэлайрал акъвазна. Адан гафаралди, медицинадин идарайри кьилиз акъудзавай къуллугърин ери ахтармишуниз (аслу тушир къимет гуналди)  кьилин фикир гуда. Идалайни гъейри, ада здравоохраненидин министерстводиз регионрин здравоохраненидин гьалар хъсанарунин жигьетдай вири патарихъай  куьмек гун хиве кьуна. ГьакIни советдин членри медицинадин  куьмекдин ери хкажун ва а къуллугъар гъил агакьдайвал авун патал меслятар (теклифар) гьазурда.

Совещанидал здравоохраненидин ­хи­ле хъсанвилихъ хьанвай дегишвилери-кай­­ни рахана. ИкI, “Россиядин дидеяр” тIвар­ алай Вирироссиядин тешкилатдин Да­­гъустандин отделенидин председатель Таисия Мегьамедовади вичин ахтармишунрикай лагьана. Адан гафаралди, азарханаяр дарманралди таъминарунин жигьетдай гьалар, анра медицинадин персо­налди азарлуйриз дикъет гунин кIвалах, гьакI­ни стационарра шартIар хъсан хьанва.­

Совещанидал авур веревирдерин нетижада  четин месэлаяр ва суалар тайинарун, гележегда абур арадай  акъуддай план туькIуьрун патал мукьвал вахтара советдин членар кIватIунин къарар кьабулна.

Алава хъийиз кIанзава хьи, Общест-венный советдик республикадин жуьреба-жуьре тешкилатрин векилар акатзава. И къурулушдик кваз кьве йисан вахтунда абур здравоохраненидин месэлайрал машгъул жеда. Советдин кIвалах­д­и­кай  малуматар Дагъустандин здравоохраненидин министерстводин сайтда гуда.

«Лезги газет»


Всего просмотров: 88

Читайте также: