Илимдин къагьриман тир

Илимдин алемда вичихъ еке ну­­фуз хьайи чи халкьдин зурба ве­килрикай сад технический илимрин доктор, профессор Серкеров  Серкер  Акберович  тир. Ам 1937-йи­сан 3-июндиз Докъузпара райондин Мискискарин хуьре дидедиз хьана.

1960-йисуз Азербайжандин нафтIадинни химиядин институт (АзИНХ) тафаватлудаказ куьтя­гьай­далай кьулухъ ам И.М. Губкинан тIварунихъ галай Москвадин  наф­тIа­­динни газдин институтда аспирантурадик экечIна. Машгьур вузда­ илимдин дережа къачур чи ватанэгьлидин алакьунрални чирвилерал гьейран хьуналди, институтдин кьиле авайбуру Серкер Акберович масанихъ ахъай хъувунач. Илимдин къуллугъдал кIва­ла­хиз башламишай ватанэгьлиди гуьгъуьнлай ана илимрин докторвилин диссертацияни агалкьунралди хвена.

Илимдин рекье ассистентвиле кIвалахунилай башламишай адакай са тIимил чIавалай доцент, гуьгъуьнлай профессор ва нафтIадин­ни газдин гьукуматдин академиядин геологиядинни геофизикадин факультетдин декан хьана.

Зурба алим 2011-йисан 11-октябрдиз рагьметдиз фена. С.Серке­рова 1992-йисалай уьмуьрдин эхир­далди геофизикадинни ком­пью­террин системайрин кафедрадин заведующийвал авуна.

Машгьур алимдин къелемдикай 180 илимдин кIвалах, гьа жергедай яз нафтIадиз талукь чпихъ тешпигь авачир хьтин 6 монография, 3 учебник ва технический вузра кIелзавай студентар патал 20-далайни гзаф учебный пособияр хкатна.

Геофизика ахтармишунин, чирунин рекье адан алакьунар дуьньядин дережада машгьур хьана, адан ктабрикай Россияда, гьакI къе­це­патан уьлквейрани гегьеншдиз менфят къачузва.

Серкер Акберовича Амстердамда, Женевада, Каирда, Лос-Анджелесда, Лейпцигда ва хейлин масанра кьиле фейи илимдин конференцийра, симпозиумра зарбачивилелди иштиракна.

Илимдин къагьримандив лайихлу шабагьарни агакьна. ИкI, ам И.М. Губкинан тIварунихъ галай премиядин, “РФ-дин лайихлу геолог”, “РФ-дин кьилин пешекарвилин образованидин сейли къуллугъчи”, “Газдин промышленностдин сейли къуллугъчи” тIварарин  сагьиб хьана. Алим Евро-Азиат­ский геофизикадин, геофизика ахтармишунин рекьяй Америкадин, Европадин геофизикрин общест­войрин ва РАЕН-дин член тир. Илим­да къазанмишнавай агал­кьун­риз килигна ам РАЕН-дин П.Л. Капицадин тIвару­нихъ галай медалдалдини къейдна.­

ЧIехи алимдин уьмуьрдинни илимдин рекьерикай алим Къ.Х. Акимован “Лезгистан” (2015) энциклопедияда, ББЭ-да (Большая библиографическая энциклопедия) са кьадар делилар ава.

«Лезги газет»


Всего просмотров: 111
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире