Илимда агалкьун

Мукьвара Москва шегьерда кардик квай  И. М.Сеченован тIварунихъ галай МГМУ-да “Вуздин илим. Инновация” международный форумдин сергьятра аваз кьве йикъан къене здравоохраненидин хиле кIвалахзавай жегьил алимрин конкурс кьиле фена.

Уьлкведин вири пипIерай 1200-далайни гзаф жегьил алимри иштиракай конкурсдин финалдиз 43 алимдин илимдин кIвалахар акъатна. Шадвилелди къейд ийин, конкурсдин финалдин паюниз акъатай жегьил алимрин жергедик Махачкъаладин “Астрамед” клиникадин акушер-гинеколог, ДГМУ-дин акушервилин ва гинекологиядин кафедрадин ассистент  Наида  Гъанифаевна  Уружевани  ква. Медицинадин рекье хъсан тежриба ва чирвилер авай духтурди ДГМУ-да медицинадин илимрин доктор, профессор Асият Эседовадин регьбервилик кваз аспирантурада кIелзава.

Конкурсдин сад лагьай юкъуз Наидади вичин диссертациядин темадай (“Оптимизация тактики ведения пациенток с метаболическим синдромом в постменопаузальном периоде”) кIелай докладдиз Москвадин машгьур профессоррин президиумди чIехи къимет гана.

Кьвед лагьай юкъуз конкурсдин нетижаяр кьуна ва гъалибчияр дипломралди къейдна. Илимдин вини дережадин конкурсда лайихлу 2-чка кьур Наида Уружевадив РФ-дин здравоохраненидин министр Михаил Мурашкоди ва Сеченован университетдин ректор Павел Глыбочкоди диплом вахкана.

Россиядин вилик жергейра авай вузрин­ арада 2-чка кьун дамах ийиз жедай кар я. Чна Наида ­Уружевадиз кIвалахда, илимда мадни еке агалкьунар хьун алхишзава.

«Лезги газет»


Всего просмотров: 51
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире