Илгьамдин лувараллаз

Заз  Ярметов  Гуьлмет  Ярметович  чиз хейлин йисар я. Кьудкъад йиса авай агъсакъал хайиди тир Чуьхверхуьрел, ЦIийи Макьарал, Кьасумхуьрел мярекатра иштиракиз жеда. Ада хуьре 4-класс, Хутар­гъа 7-класс  куьтягьна. Школада кIелзавай йисара шиирар кхьизвай, манияр лугьузвай.

Армиядин жергейра къуллугъна хтайдалай кьулухъ Гуьлметани Гуьлуьшана хизан кутуна, кьве гадани са руш чIехи авуна. ЧIехи гада Нур­мета хуьре муаллимвал ийизва. ГъвечIи гада ­На­зир­мет Сургутда ава. Руш Ислихан кьисметди Дар­кIуш-Къазмайрал акъудна.

Гуьлмета хуьруьн художественный самодеятельностда рикIивай иштиракзава. Къунши хуьрериз – Качалхуьруьз, Мехквергъиз, Хутаргъиз физ, гьевеслу артистди СтIал Сулейманан, Хуьруьг Та­гьиран чIалар, Шагьпазова Сайибатахъ, Гьажиева Бесханумахъ галаз зарафатдин дуэтар – “Регъуьхбандиз”, “Темпелдиз” – устаддаказ тамамарда.

Са тIимил вахтунда ада Хивда райондин культурадин кIвалени кIвалахна, концертар гваз Хив ва Агъул районрин хуьрериз фена, табасаранарни агъулар лезги манийрихъ галаз танишарна.

Сулейман-Стальский райондин гьевескар артистрихъ галаз санал Гуьлмет Дербент, Огни, Махачкъала шегьеррани хьана. Адаз анра са шумудра савкьатар, пишкешар гана.

Гуьлметан кьетIен зегьмет – ада кхьей ва чапдай акъуднавай “Чуьхверхуьр”, “РикIин хиялар”, “Уьмуьрдин гел”, “Вахтунин эсерар” ктабрихъ галаз ала­къалу я.

Адан чIалар муьгьуьббатдикай, Ватандикай, дидедикай… теснифнавайбур, халкьдин чIалариз мукьвабур я.

Таз тараллай пад яру ич,

КIаник финалд аватдани?

Кьадар-кьисмет хьанач лугьуз,

Вун рикIелай алатдани?

Аялзамаз дах кьейи (1942-й.), дяведин йисара каш-мекь акур Гуьлметаз дяве вуч ятIа хъсандиз чида. Гъуьр кьенят ийиз, тинидик хъчар, таквар, сирисанбалар кутадай. Хутаргъиз школадиз фидайла, чими хьурай лугьуз, шаламра самар твадай…

Етим Эминан са юбилейдихъ галаз алакъалу яз теснифай шиирда ихьтин цIарар ава:

Ваз эцигай буьруьнж гуьмбет

Яшамишрай хайи миллет,

Чаз багьа я ви тIвар, гьуьрмет,

Экв гузвай рагъ Эмин буба.

Сталинакай тарифдин чIални ажа­йибди я. Ам Гуьлмета 9-Майдин мярекатра лугьузва. Ингье кьве бенд:

Сталиназ вуч гаф авай,

КIвач метIел кьван чекмедавай.

Чан акъатнай Германидин,

Кьве кIвач къана живедавай.

 

Сталинан тавдин кьацIак

Чубарукри муг авунай.

Рагьметар хьай Сталина

Гитлер – душман руг авунай…

Гуьлмет халу къени рикI авай, михьи кас я. Кьудкъад йиса авай агъса­къал­ди гилани кьисмет тахьай ярдикай цIийи-цIийи чIалар теснифзава. Къуй ви къелем мадни хци хьурай, гьуьрметлу манидар…

Эйзудин Сайдумов


Всего просмотров: 100

Читайте также: