Игит рикIе аваз

24-январдиз Кьурагь райондин Кlирийрин хуьре, Зейнудин Батманован тlварунихъ галай школа-интернатда, ЧIехи Гъалибвилин 75 йисан­ юбилейдин сергьятра аваз, Россиядин Игит  бандитри яна кьейи  Зейнудин  Лукьманович  Батманов  рикlел хкуниз талукьарнавай 40 ва адалай гзаф яшар хьанвайбурукай ибарат командайрин арада волейболдай турнир кьиле фена.

Мярекатда Кьурагь райондин кьил Замир Азизова, райондин ветеранрин ва агъсакъалрин советдин председатель Фахрудин Мирзоева, об­разованидин, спортдин, культурадин отделрин къуллугъчийри, хуьруьн жемятди, школа-ин­тер­натдин коллективди ва прессадин векилри иштиракна.

Турнир башламишдалди вилик Россиядин Игит Зейнудин Батма­­нован тlвар эбеди ийизвай мемо­риал­ьный кьул ачухуниз талукьарнавай митинг  школа-интернатдин  9-класс­да кlелзавай Гьамият Алимирзоевадини  Милана Рагьимовади ачухна.

Анал рахай Замир Азизова вичи Зейнудинахъ галаз школада кlелай йисар, хуьре гадайри саналди авур кlвалахар, къугъунар ва Зейнудинан уьмуьрдикайни адан хесетрикай делилар рикlел хкана:

— Зейнудинан чина гьамиша шадвални хъвер авай. Адаз  вири инсанар вичин  багърияр хьиз кlандай. Ам гьамиша са гьихьтин ятlани кlва­лах­дик кваз жедай. Садазни кефина акьадай гаф лу­гьудачир, вичивай жедай куьмек гуз гьамиша гьазурди тир. Гьам школада кlелзавай йисара, гьам кlвалахда адаз зегьмет чlугваз кlандай, гъиле кьур гьи кlвалах хьайитlани, намуслувилелди кьилизни акъуддай.

Гьайиф, бандитри чавай кьегьал хва къа-къуд­на. Ам чи рикlелай садрани алатдач. Адан тlвар чи ва гележегдин несилрин рикlе эбеди я.

Школа-интернатда кардик квай спортшколадин директор Надир Тагьировани Зейнудин Батманован уьмуьрдикай суьгьбетна:

— Чна са школада кlелайди, чирвилер къа­чур­ди я. Адаз школадин йисарилай дамах гва­чирвал­, зегьметдал рикl хьун ва маса хъсан ери­­яр хас тир. Эхь, ада са тахсирни квачир хизан­ къу­та­рмишна, бандитрин буйругъни кьилиз акъуд­нач. Адан вилик кьве рехъ квай: тахсир квачир­ инсанар маса гун, я тахьайтlа, абур хуьн па­тал жуван чан къурбанд авун. Ада кьвед лагьайди хкяна.

Эгер ада бандитрин эмир кьилиз акъуд­най­тlа, са тахсирни квачир шумуд цlудралди чанар пуч хьун мумкин тир. З.Батманов вичин гафунал­ кlе­виз акъвазна. Эхь, ам халисан инсанперес тир. Россиядин Игит Зейнудин Батманован кьегьалвал несилрин рикlера эбеди яз амукьда.

Фахрудин Мирзоева вичин рахунра ихьтин мярекат тухунихъ еке метлеб авайди къейдна.

Советрин Союздин халкьари фашизмдин винел къазанмишнавай ЧIехи Гъалибвал шаклувилик кутаз, адан метлеб агъузариз, И. Сталин кьиле аваз къазанмишнавай Чlехи Гъалибвал хъендик кутаз алахънавайбур пайда хьанвайди, чун ата-бубайрин, бубайрин весийриз, адетриз вафалу тирди къейдна; чи чlехи Ватандин къудратлувал мягькемарун патал вирида сад хьиз зегьмет чlу­гуна кlанзавайди лагьана.

Зейнудин Батманован тlвар эбе­ди­ авунин лишан — мемориальный кьул Замир Азизовани Надир Тагьи­ро­ва ачухна. Анал аялри цуьквер эцигна.

Россиядин Игитдин уьмуьрдин юлдаш Жамиля  Батмановади мярекатдиз атанвай мугьманриз, турнирдин иштиракчийриз вири мукьва-кьилийрин патай сагърай лагьана.

Ахпа волейболдай къугъунар башламишна.  Сад лагьай сеферда тухузвай турнирда Кьурагь райондин, Мегьарамдхуьруьн райондин Советский хуьруьн, Дербент райондин ва Кlирийрин хуьруьн ветеранрин командайри иштиракна.

Турнирдин кьилин судья Эдгар Алибегов тир.

Кьурагь райондин команда — 1, Дербент райондин — 2 ва Советский хуьруьнди 3-чкайриз лайихлу хьана.

Мярекатдал райондин кьили ва райондин спортдин отделдин начальник Рамиз Рамазанова гъалибчи командадив ва 2-3-чкаяр кьур командайрив талукь дережайрин медалар, грамотаяр ва пулдин пишкешар авай конвертар вахкана.

Жив къвана, мекьи югъ тиртlани, кьве мярекатни тешкиллувилелди кьиле фена.

Къагьриман  Ибрагьимов


Всего просмотров: 101
Подпишитесь на наши каналы:

Читайте также:


Новости партнеров