Игит диде – педагог

Рутул район  сад-садахъ галаз хатурлу, зегьметдал рикI алай баркаллу инсанралди девлетлу я. Чкадин шартIари абур вири четинвилер алудиз вердишарнава.

Зи ихтилат, и райондин Кичерин хуьре хана, чIехи хьайи, Игит ди­де, зегьметдин ветеран  Чичек  Гьажимегьамедовна  Абдулже­лило­­вадикай  я. Ам 1947-йисуз гзаф аялар авай хизанда дидедиз хьана. Хуьруьн колхозчияр тир Гьажимегьамедахъни Айишатахъ 8 велед авай: 5 хва ва 3 руш. Абурукай­ чIе­хиди Чичек тир. Гьавиляй гьеле аялзамаз дидеди руш кIвалин ва хуь­руьн майишатдин гзаф кIвалах­рал желб ийиз хьана. Чичек Гьажи­ме­гьа­медовна­диз зегьмет вуч ятIа, гафа­рай ваъ, гьа­къи­­къат­да акуна. Дяведилай гуьгъуьнин залан йисара, вири аялриз хьиз, гьадазни бес кьадар фу-пар­тал жа­гъизвачир, ятIани ада кьил агъузнач. 1955-йисуз Чичек Кичерал сифтегьан школадиз гьахьна. Ина 5-класс акьал­тIар­­на, ада вичин кIе­лу­нар райондин центрада юкьван школада дава­марна.

Ина  а вахтара Урусатдин жуьреба-жуьре пи­пIерай атанвай са десте жегьил ру­шари муаллимвиле кIвалах­завай. Чичек Гьажиме­гьа­медовнадин ри­кIелай вичиз Рутула тарсар гайи Ли­дия Ивановна Айвазовадин, На­деж­да Петровна Гьуьсейновадин, Зинаида Ивановна Гьасановадин, Мария Евсеевна Тылинадин, Людмила Васильевна Нестеровадин, Ираида Ивановна Майсаровадин ва гзаф масабурун хуш къаматар, къилихар, чпин пешедиз вафалувал алатзавач. Зун инанмиш я, гьабурун таъсирдик кваз Чичек Гьажимегьамедовнадини муаллимвилин пеше хкяна.

1964-йисуз Чичек Гьажимегьамедовна Абдулжелилова Буйнакск шегьерда кардик квай дишегьлийрин педучилищедиз гьахьна. Ана сифтегьан классрин муаллимвилин пешедай чирвилер къачуна. Эхь, Чичек Гьажимегьамедовна ви­чин рикIе авай экуь мураддив агакьна. Училищеда кIелдайлани, адаз  гзаф кьадар урус муаллимри куьмек гана. Студентвилин йисара адакай ВЛКСМ-дин член ва училищедин жегьилрин арада хъсан тешкилатчи хьана. Жегьилрин гзаф мя­рекатрин башчи, активный иштиракчи тир. И карди адаз гьам муаллимрин, гьам студентрин арада гьуьрмет ва авторитет гъана.

Лап хъсан къиметралди учили­ще­­ акьалтIарна, Чичек Гьажиме­­­гьа­медовнади Рутула 1-нумрадин юкь­ван школада кIвалахна. Кьве йи­са­лай ам, сифтегьан классрин му­ал­лим яз, хайи хуьруьз хта­­на­. Ина ада саки 15 йисуз зегьмет чIу­гу­­на­.

Хизандин шартIар хъсан хьун патал 1984-йисуз вичин итимдихъ галаз Чичек Гьажимегьамедовна Ростовдин областдиз Егорлыкский райондиз куьч хьана. Войновка хуьре ада аялрин бахчада тербиячи яз кIвалахна.  Сад-садан гуьгъуьналлаз хьанвай 10 аял кIвачел акьалдарун патал Чичек Гьажимегьамедовнади аялрин бахчадилай гъейри, чкадин маларин, къушарин фер­майрани кIвалахиз хьана. Эхь, ина чкадин агьалийри и чIехи хизандиз вири жуьредин куьмекар гана.

Уьлкведа алатай асирдин 90-йисара “перестройкадин” гьерекат башламиш хьайила, чIехи хизан мад хайи хуьруьз хтуниз мажбур хьана. Хайи муг виридалайни ширин жеда, гьавая лугьузвайди туш. Ина Чичек Гьажимегьамедовнади сифтегьан классрин муаллим яз вичин кIвалах давамарна. Ам къени чи хуьре лап гьуьрметлу муаллимрикай ва гьунарлу дидейрикай сад я. Адан тежриба Рутул райондин вири школайра чирзава.

Вичин итим Идрисов Анварбегахъ галаз санал ада 8 хвани 2 руш чIехи авуна. Алай вахтунда абурухъ 14 хтул ва са птул хьанва. Вири аялар халисан ватандашар, намуслу, гъейратлу дагъвияр хьиз, халкьдин лап хъсан адетралди, гъвечIи-чIехи ва зегьмет вуч ятIа чиз, вердишарнава. Рухвайри вирида вузар акьал­тIарна, законар хуьдай къурулушра уьлкведин жуьреба-жуьре пипIера кIвалахзава. Рушар чпин хизанар га­лаз динж я. Мегер ихьтин дидейрал, балайрал дамахдачни!

Игит диде ва гьунарлу педагог Чичек Гьажимегьамедовнадин зегьмет адаз “Дагъустан Республикадин образованидин отличник” знак, “Зегьметдин ветеран” медаль, ма­са шабагьар гуналди къейднава.

Виридалайни чIехи награда яз Чичек Гьажимегьамедовнади вичихъ гьам хуьре, гьам районда дидейринни аялрин арада, вичи тарс гайи виликан ученикрин патай авай гьуьрмет ва авторитет яз гьисабзава. Адан тIвар Дагъустандилайни яргъара машгьур хьанва. Жегьил муаллимри адан тежриба чирзава. ГьикI лагьайтIа, Чичек Гьажимегьамедовнадин гьар са келимадани чIехи руьгь, рикIин михьивал ава.

Чна, адан виликан ученикри, вири хуьруьнвийри, 8-Март­дин сувар рикIин сидкьидай мубаракзава.

Яргъал йисаралди, сагъ яз, шад яз, яшамиш хьухь, чи гьуьрметлу Чи­­чек Гьажимегьамедовна!

Гьасангьуьсейн Абдулжелилов, Рутул райондин жегьилрин “Ватан хуьзвайди” тешкилатдин председатель


Всего просмотров: 9

Читайте также: