ХъуьтIуьз гьазур я

“РусГидро” ПАО-дин  Дагъустандин филиал 2019-2020-йисан зулунни хъуьтIуьн сезондиз  гьазур я — ихьтин нетижа  хкуднава РФ-дин  энергетикадин министерстводи. Кьиле тухванвай ахтармишунин нетижада филиалдив зулунни хъуьтIуьн сезондиз гьазурлухвал тестикьарзавай паспорт вуганва, хабар гузва компаниядин пресс-секретарь Эмилия Казумовади.

Пешекарри филиалди къуллугъзавай гидростанцийрин, дараматрин  асул ва куьмекдин электротехнический ва гидромеханический тадаракар, гьакIни мумкин тир ава­рийрин­ нетижаяр арадай акъудунин кардиз гидростанцийрин къуллугъчияр гьазур хьунин дережа ахтармишна.

Махсус комиссиядин членри  къейд авурвал, Дагъустандин филиалдин вири ГЭС-рал  аварийриз ва цIаяр кьуниз акси автоматикадиз, гьакIни релеяр хуьдай тадаракриз  техни­ческий рекьяй къуллугъ вахтунда ва ерилудаказ авунва.

Зулунни хъуьтIуьн сезондиз гьазур хьунин дережа Дагъустандин филиалда гьар йи­суз ахтармишзава, гьикI хьи, йисан мекьи вахтунда уьлкведин сад тир энергосистемадал акьалтзавай гуж са кьадардин гзаф жезва. И вахтунда  энергетикадин къурулушдал гьалтзавай артухан пар алудиз ва лазим­ кьадар электроэнергия агакьариз гидростанцийри куьмек гузва, яни абур энергетикади дурумлудаказ кIвалахунин заминар я лагьай­тIа жеда.

Гьазурлухвилин  паспорт гидростанцийри­ зулунни хъуьтIуьн вахтунда атIунар авачиз ва дурумлудаказ кIвалахун патал лазим  ви­ри шартIар кьилиз акъуднавайди тестикьарзавай асул документ я. Сезон алукьдалди ви­лик РусГидродин Дагъустандин филиалдин къурулушдик акатзавай вири карханайри тешкиллувилинни технический рекьяй са жерге серенжемар кьабулзава.

РикIел хкин, “РусГидро” ПАО-дин Да­гъус­­тандин филиалди, санлай къачурла,  1885,5 МВт-дин гужлувал авай 16 гидроэлектростанциядиз къуллугъзава.

Чи мухбир


Всего просмотров: 15
Подпишитесь на наши каналы:

Читайте также:


Новости партнеров