Хушдиз кьабулна

16-январдиз Махачкъаладин аэропортуна Дагъустандин культурадин министр Зарема Бутаевади, Дербентдин мэр Малик Баглиева, Госдумадин депутат Гьажимет Сафаралиева, мукьва-кьилийрини ярар-дустари РД-дин лайихлу артист, музыкадин “Голос” проектдин ругуд лагьай сезондин гъалибчи, бажарагълу ватанэгьли Селим Аллагьяров къаршиламишна.

З.Бутаевади къейдайвал, чи ватандашди къазанмишнавай агалкьундал  вири республика рикIин сидкьидай шад я. “Къейд авуниз лайихлу и вакъиади вири дагъус­танвияр садна. Чи вири ватандашар, республикадилай къеце яшамиш жезвайбурни, гьа хъсан ва кар алай легьзеда сад хьана. Селиман  вилик мадни гзаф гъалибвилер ква…, – лагьана Зарема Бутаевади.

КIватI хьанвайбурун тIалабуналди С.Аллагьярова “Чертово колесо” мани тамамарна, вичин тереф хуьнай ви­ридаз сагърай лагьана ва мукьвал тир вахтунда вич Дагъустандиз чIехи концерт гваз хкведайди, алай вахтунда Александр Град­скийдихъ галаз адаз гьазурвал аквазвайди малумарна. “Ватанда концерт хьун лазим я!” – алава хъувуна Селима.

***

Накь РД-дин Гьукуматдин Председателдин везифаяр вахтуналди тамамарзавай Абдусамад Гьамидов “Голос” шоудин ругуд лагьай сезондин гъалибчи, республикадин лайихлу артист Селим Аллагьяровахъ галаз гуьруьшмиш хьана. Мярекатда Селиман диде Майя Рагьимхановади, РФ-дин искусствойрин лайихлу деятель, композитор Мегьамед Гьуьсейнова, РД-дин Гьукуматдин Председателдин Сад лагьай заместителдин везифаяр вахтуналди тамамарзавай Анатолий Къарибова, республикадин культурадин министрдин везифаяр вахтуналди тамамарзавай Зарема Бутаевади иштиракна.

Абдусамад Гьамидова Дагъустандин руководстводин ва кьилди вичин патай манидардиз гъалибвал тебрикайдалай кьулухъ артистдин дидедизни насигьатчидиз сагърай лагьана.

“Чун и гъалибвилел шад я. Кесерлу конкурсдин кьилин шабагьдиз лайихлу хьанвай чи бажарагълу ватанэгьлидал вири Дагъустанди дамахзава. Заз гьакI­ни вичин хцихъ хъсан сес авайди винел акъудай Майя Асимовнадиз, Селимахъ авай бажарагъ кьатIана, адаз ихьтин ку­кIушрал хкаж хьунин карда куьмекар гайи Мегьамед Азизхановичаз мад сеферда сагърай лугьуз кIанзава”, – лагьа­на республикадин премьер-министрдин везифаяр вахтуналди тамамарзавайда.

Ада Селим Аллагьяровахъ гележегда мадни еке агалкьунар хьун алхишна ва манидардиз культурадинни искусстводин хиле къазанмишнавай агалкьунрай Дагъустандин Кьилин тIварцIин сят багъишна.

Зарема Бутаевади Дагъустандай тир культурадин деятель хушдаказ кьабулунай, адан алахъунриз виниз тир къимет гунай чухсагъул малумарна.

Вичин нубатда Селим Аллагьярова дагъустанвийрин тIварцIихъ хуш келимаяр лагьана. “Чи республикайри активдаказ сесер гузвай. Виридалайни пара сесер заз Дагъустандай ва Чечнядай га­на. Зи гъалибвилик абурун еке пай ква, гьавиляй ам за умумиди яз гьисабзава. Гьа са вахтунда им зи уьмуьрда асул гъалибвал туш, гурарин анжах сад лагьай кIар я”, – инанмишарна жегьил артистди.

Майя Рагьимхановади вичин хциз гъалибвилихъ финин рекье куьмекар гайи республикадин культурадин министерстводиз, Мегьамед Гьуьсейноваз, Гьукуматдин членриз сагърай лагьана.

Мегьамед Гьуьсейнова Селима искусстводин рекье къачур сад лагьай камар рикIел хкана ва адахъ еке гележег авайди къейдна.

“Лезги газет”


Всего просмотров: 33

Читайте также:

Добавить комментарий

Войти с помощью: