Хци месэлайрикай сад

Дагъустандин Кьилин везифаяр вахтуналди тамамарзавай Владимир Васильева тухвай нубатдин совещанидал гатун девирда цIаяр кьуникай хуьн таъминарунин месэлаяр веревирдна. Совещанидин кIвалахда республикадин Гьукуматдин Председатель Артем Здунова ва РД-дин тамарин майишатдин рекьяй Комитетдин председатель Алибег Гьажиева иштиракна.

Месэла веревирд авунив эгечIдай­ла, Владимир Васильева къейд авурвал, республикадин тамарин майишатдин рекьяй Комитетдин делилралди, цIи цIаяр кьунин дуьшуьшрин кьадар, шазандав гекъигайла, тIимил я. “Алай вахтунда чи тамара цIаяр кьунин дуьшуьшар тахьанвайдан патахъай ван хьун ва и кардай квез ва куь работникриз сагърай лугьун чаз хуш я. За мад сеферда къейдзава: Дагъустанда, Россияда, са жерге къецепатан уьлквейрани кьадарсуз гзаф чимизва. Гьайиф хьи, бязи уьлквейра цIаяр кьунин дуьшуьшрик инсанарни телеф хьанва. Гьавиляй къе чна и месэла веревирдни ийизва.  Серенжемар кьабулзаваз хьун – им хъсан кар я. Гьа са вахтунда идан патахъай чи агьалийри фагьум-фикир авун герек я. Акатай чкадал пIапIрус чIугуртIа, аялар цIув мукъаятсуздаказ эгечIайтIа, еке бедбахтвилиз элкъведа. Гьавиляй за вирибурувай и гзаф зегьем вахтунда, гьич са касни цIаяр кьунин себебкардиз элкъвен тийидайвал, чараяр акун тIа­лабзава.

А.Гьажиева вичи, дагъустанвийрихъ элкъвена, ихьтин келимаяр лагьайдан гьакъиндай хабардар авуна: “Играми ватанэгьлияр, за квевай тIалабзава: цIай кьунин дуьшуьш арадал атайтIа, телефондин агъадихъ галай нумрадиз зенг ая: 94-01-04. Диспетчервилин къуллугъди суткада кьиляй-кьилиз кIвалахзава. Тама кьуранвай векьер, зирзибил кумир! Ида цIаяр кьунал гъида”.

Къейд авун лазим я хьи, тамара цIа­яр кьуниз талукь месэла вири дуьньяда лап хцидаказ акъвазнава. ЦIаяр кьуникди набататрин ва гьайванрин алемдиз зурба зиянар жезва. ЦIай кьун себеб яз инсанарни телеф хьун мумкин я. Гьавиляй тамари цIаяр кьунин рехъ атIунин се­­ренжемар кьабулун важиблу я. Идахъ га­лаз алакъалу яз тамар, хуьрер ва шегьерар цIаяр кьуникай хуьнин месэлаяр кье­тIен гуьзчивилик кутун тапшурмишнава.

“Лезги газет”


Всего просмотров: 35

Читайте также: