Хъсан крариз майилвалзавайди

Яшайиш кьиле тухузвай чкадилай аслу тушиз, алакьунар авай ва къазанмишнавай агалкьунрал рази хьана санал акъваз тийидай, вичин кlвалах­дикай жемиятдиз менфят гудай къайдада зегьмет чlугваз­вай къуллугъчийриз вири чкайра гьуьрметни нуфуз жеда. Алай вахтунда гъурбатда яшамиш жезвай ва кlвалахзавай чи ватанэгьли  Шагьэмир  Керимович  Керимовни  гьа ихьтин ксарикай сад я.    

Ам 2016-йисан ноябрдилай Ханты-Мансийский автономный округдин (ХМАО) Пыть-Ях шег­ьердин кьилин заместитель, и шегьердин депутатрин ко­миссиядин гьамишан член, “Врестлинг” ООО-дин директор я.

Шагьэмир Керимов 1961-йи­суз Сулейман-Стальский райондин ЧIилихърин хуьре ди­­дедиз хьана. 1984-йисуз ада Дагъустандин политехнический институт куьтягьна. Шагьэмир Керимовичан зегьметдин рехъ 1979-йисуз Дербентдин кlва­лер эцигдай комбинатда монтажник яз кlвалахунилай башламиш хьана. 1979-1984-йисара ада Да­гъустандин политехнический институтдин эцигунрин факультетда кlелна. Студент тир йиса­ра ам комсомолдин тешкилатдин секретарвиле  хкяна ва ада факультетдин кlелунинни тербиядин рекьяй комиссиядиз регьбервална.

1984-1986-йисара Советрин Яракьлу кьуватрин жергейра Ватандин вилик вичин буржи тамамарна. Исятда ам запасда авай офицер я. Гуьгъуьнлай ада Ростов шегьерда СССР-дин Минмонтажспецстройдин системада кlвалах давамарна. Ина ада военный ва промышленный четин объектар эцигунин кIва­лахриз  регьбервал гана.

1996-йисуз кьисметди Шагь­эмир Керимов хизанни галаз Пыть-Ях шегьердиз акъудна. Цlийиз куьч хьайи шегьерда са йисалай тежриба ва алакьунар авай пешекардикай “Врестлинг” ООО-дин директордин заместитель хьана. И тешкилатда ам 2001-йисалай юристдин къуллугъдал элячlна.

Къейд ийиз кlанзава, вичин везифаяр гьакъисагъвилелди кьилиз акъудзавайвиляй ада къуллугъдин ва чирвилер къачунин жигьетдайни виликди камар къачузва. 1999-йисуз ам Сургутдин госуниверситетдин юридический факультетдин заочный отделенидик экечlна ва 2003-йисуз анаг “Юриспруденция” пешедай тафаватлудаказ куьтягьна. 2004-йисалай ам ХМАО-да кlвалахунин рекьяй РФ-дин Госдумадин депу­тат К.А. Амирован куьмекчи я.

2005-йисуз хъсандиз кlва­лахунай адаз РФ-дин Госдумадин Кеферпатан ва Яргъал тир Рагъэкъечlдай патан месэлайрин рекьяй комитетди чухса­гъул­дин чар ракъурна. Пыть-Ях ше­гьерда ам спортдин, вете­ран­рин ва яратмишдайбурун дес­тейриз къаюмвал авунай са шу­муд сеферда “Йисан инсан” яз гьисабна. 2005-йисуз  округдин машгьур къаюм, меценат яз чи ватанэгьлидин лайихлувилер аялрин “Бахт” ордендалди, ХМАО-дин 70 йисан юбилейдихъ галаз алакъалу яз и округ­дин губернатордин дипломдалди къейдна. Адахъ “Карчивиле лайихлувилерай” медаль ва маса наградаярни ава.

2005-йисан декабрдилай ада “Врестлинг” ООО-дин директор яз кlвалахзава. Шагь­эмир Керимован хизанда пуд аял ава.

Куругъли Ферзалиев


Всего просмотров: 197

Читайте также: