Хъелзавайбур меслят хъувун

Аллагь-Таалади лагьана: “Абуру чинеба ийизвай ихтилатрикай гзафбура хийир авач, эгер са касди садакьа гунихъ, хъсан крар авунихъ ва я инсанар чеб-чпихъ галаз меслят хъунихъ эверзавач­тIа…” (“Ан-Ниса”, 114).

Аллагьди гьакIни лагьана: “…Аллагьдихъай кичIе ва куьн баришугъ хьухь…” (“Аль-Анфаль”, 1). “Инанмишбур стхаяр я. Гьавиляй арада къал авай куь стхаяр меслят хъия…” (“Аль-Гьужурат”, 10).

Гьадисар

1.Умм Кульсум бинт Укба бинт Абу Муайта лагьана:

“Заз, Пайгъамбарди (с.а.с.) лугьуз, ван хьана: “Вуж хъсан гафар лугьуз, инсанар чеб-чпихъ галаз меслят ийиз алахънаватIа, а кас тапархъан жедач”. (Аль-Бухари, Муслим).

2.Абу-аль-Аббас Сагьль бин Сад ас-Саидиди лагьана:

“Бану Амр бин Авф тайифадай тир инсанар чеб-чпихъ галаз къалмакъал хьайиди чир хьайи­­ла, чеб-чпихъ галаз меслят хъувун патал Аллагьдин Расул (с.а.с.) са шумуд касни галаз абурун па­тав фена. Ана Пайгъамбар(с.а.с.) энгеларна. Гьа арада капI ийидай вахт алукьна. Гьа чIавуз Билал Абу Бакран  патав атана ва лагьана: “КапI ийидай вахт хьанва. Вуна инсанрихъ галаз и капI кьиле тухудачни?” Абу Бакра лагьана: “Эхь, ваз кIанзава­тIа”. Билала икъамат гана. Абу Бакр вилик экъечIна ва лагьана: “Аллагьу акбар”. И  гафар инсанрини тикрарна ва и арада Аллагьдин Расул (с.а.с.) атана акъатна. Ам сад лагьай жергеда акъвазна. И кар акур инсанри капар гьалчиз хьана, амма Абу Бакр, капI ийидайла, садрани патарихъ килигдачир. ГьакI ятIани, капар кIевиз гьалчиз башламишайла, ам кьулухъ элкъвена ва бейхабардиз адаз вичин кьулухъ Аллагьдин Расул (с.а.с.) акуна. Ада ишарадалди­ Абу Бакраз вичин чкадал акъвазун буйругъна. Ам­ма Абу Бакра гъилер хкажна, Аллагьдиз шукур гъана ва, кьулухъ хьана, сад лагьай жергеда акъвазна. Аллагьдин Расул (с.а.с.) лагьайтIа, вилик экъечI­на ва инсанрихъ галаз капI кьиле тухвана. КапI авуна куьтягьайла, инсанрихъ элкъвена, ада хабар кьуна: “Вучиз куьне купIунин вахтунда, квез са кар хьайила, капар ягъиз башламишна? Ахьтин вахтара капар анжах дишегьлийри ягъун лазим я. Итимри икI лагьана кIанда: “Субгьаналлагь!”. И гафунин ван хьайила, ам чарасуз кьулухъ элкъведа. Я Абу Бакр, за ваз ишара авурдалай кьулухъ ваз капI давамариз куь манийвална?” Абу Бакра жаваб гана: “Пайгъамбар (с.а.с.) алай чкадал Ибн Абу Къухафадиз (яни вичиз) капI кьиле тухун кутугнавач”. (Аль-Бухари, Муслим).

“Ас-салам” газетдай


Всего просмотров: 39

Читайте также: