Хаталубур

Квез чидани?

Векь недай гьайванар, адет яз, муькуь вагьшийрилай регьимлубур, маса гьайванризни инсанриз зарар тагудайбур, секинбур яз гьисабзава. Амма икI фикирун гьакIан дуьзенавал я. Чпин уьмуьр хаталувиликай хкудун патал гьар са гьайван женг чIугуниз мажбур жезва.  

Векь незвай гьайванрикай гзафни-гзаф хаталу ругудак бегемот, фил, Африкадин гамиш, къабан, носорог, Америкадин бизон акатзава.

Сад лагьай чкадал алимри бегемот эцигнава. Бязи дуьшуьшра бегемотри кьилди ва я нехирралди вацIа­рал жезвай балугъчийрин луьтквейрални, къерехрив къвезвай фермеррални, хуьрерин агьалийрални гьужумзава. И хаталу гьайванрикай къутармиш хьун саки намумкин кар я. Гьам кьураматдал, гьамни це абурулай йигинвилелди гьерекатиз алакьзава.

Кьвед лагьай чкадал фил ала. Абуруз кьисас къахчун хас я. Филерин хизандикай сад инсанди кьейитIа, абуру сагъ хуьрер чукIурун мумкин я. Ихьтин дуьшуьшар малумни я.

Африкадин гамишриз инсандин патай арадал атун мумкин тир хаталувал виликамаз гьиссдай алакьун ава. Гьавиляй абуру гьужум сифте чпи башламишда.

Тамухъанри, пешекарри тестикьарзавайвал, тама къа­бандилай хаталу гьайван авач. Тама адан хурук ака­­­тай­ инсан кьиникьикай къутармиш хьун четин месэла я.

Акурла кичIе жедай хьтин гьайван ятIани, носорогди инсанрал кьериз-цIаруз гьужумда. Гзафни-гзаф шарагар галай диде-носорогар хаталу я.

Америкадин бизондив инсан агатайтIа, адаз вичин мулкарал гьужум ийизвайди хьиз жеда. Фагьумсузви­лин нетижада инсандин уьмуьр кьиникьин хаталувилик акатун мумкин я.

«Лезги газет»


Всего просмотров: 77
Подпишитесь на наши каналы:

Читайте также:


Новости партнеров