Хаталу дуьшуьшар тахьун патал

Алатай гьафтеда Ахцегь райондиз Да­гъустандин тIебиатдин ресурсрин ва экологиядин министр Набиюлла Къарачаев кьиле аваз республикадин жуьреба-жуьре ведомствойрин векилрикай ибарат са десте мугьман хьана. Абурун арада “Запкаспводхоз” ФГУ-дин директор К.Ибрагьи­мов, РД-дин тIебиатдин ресурсрин ва экологиядин министрдин сад лагьай заместитель М.Алиомаров, “Дагводсервис» ГКУ-дин регьбер Т.Къазиев ва масабур авай. Абуру гатфарихъай, дагълара авай живер цIрана, селлер атуникди Ахцегь вацI кьере вичин сергьятрай акъатунин вилик пад кьунин серенжемар веревирдна. РикIел хкин, алатай йисуз къати марфар къуникди ва вацIай гурлу селлер атуникди райондин са шумуд хуьр эквер авачиз амукьнай, рекьериз, агьалийрин багъ-бустандиз зарар хьанай.

ТIебиатдин мумкин тир бедбахтвилерин вилик пад кьун патал чкадал кьабулзавай серенжемрикай Ахцегь райондин кьил Осман Абдулкеримова, депутатрин собранидин председатель Абдул-Керим Палчаева, райондин ГО ЧС-дин ва ЕДДС-дин управленидин начальник Сердер Мол­лалиева ихтилатна.

О.Абдулкеримован фикирдалди, вацI сергьятрай акъатунин вилик пад кьун патал чараяр гиламаз акуна кIанзава. Эгер и месэладив жавабдарвилелди эгечI та­вуртIа, живер цIразвай вахтунда Самур, Ах­цегь вацIара яд артух хьунин нетижада­ муракаб гьалар арадал атун мумкин я. Рай­ондин кьили къейд авурвал, вацIариз мукьва мулкарал яшайишдин фондунин объектар, газдин, цин турбаяр, ЛЭП, республикадин метлеб авай рекьер… ала. Сифте нубатда абур хаталувилик акатда.

Меркездай атанвай пешекаррин десте талукь серенжемар кьабулун патал чкадал вацIун хаталу чкайрихъ, яни селлер атайтIа, яд алахьдай участокрихъ га­лаз таниш хьана. Месэла веревирд авурдалай кьулухъ Самур вацIун къерехар мягькемардай кIвалахар кьиле тухун патал Дагъустандин Гьукуматдивай куьмек тIалабдай къарар кьабулна.

Гьа и юкъуз Набиюлла Къарачаев Сулейман-Стальский райондизни мугьман хьана. Ина райондин кьил Нариман Абдулмуталибован, адан сад лагьай заместитель Лацис Оружеван, “Экологи-КА” ООО-дин регьбер Альберт Черникован, “Касумкентсервис” ООО-дин директор Гъалиб Фатагьован ва масабурун иштираквал аваз кьиле фейи гуьруьшда муниципалитетда зирзибил кIватIуниз, хуьрерин сергьятрилай къецепатаз акъудуниз, тIебиатдин ва экологиядин хатасузвилиз талукь месэлаяр веревирдна.

Зирзибил, амукьаяр кIватIунин ва гадарунин жигьетдай районда авай гьаларикай Гъ.Фатагьова гегьеншдиз ихтилатна. Адан гафарай малум хьайивал, феде­ральный закондик дегишвилер кухтунин нетижада зирзибил кIватIунин ва гадарунин кIвалах цIийи къайдада кьиле тухузвайдакай чкадин агьалияр вахтунда хабардарна, региондин “Экологи-КА” ООО оператордиз Кьасумхуьрел са дараматда кьилдин офис чара авуна. Адав ихтилат физвай месэладиз талукь вири программаярни документар вуганва. Районда “Касумкентсервис” ООО-дин бинедал махсус улакьрин автопарк арадал гъанва. Ана авай улакьрикай 4 Имам Яралиева маса къачунвайбур я. И карханади алай вахтунда, санлай къачурла, 42 агъзур агьали яша­миш жезвай 11 хуьруьз къуллугъзава.

Гуьруьшдал хабар гайивал, региондин операторди адахъ галаз кутIуннавай икьрарда къалурнавайвал тайин чкадал кIватI­­­­завай зирзибил вахтунда гадариз тухузвач. И месэла энгел тавуна гьялун патал райондин руководстводи РД-дин тIе­биатдин ресурсрин ва экологиядин минис­терстводивай куьмек тIалабна. Мадни баш­къа, алай йисан эвел кьилелай регион­дин операторди икьрардал асаслу яз “Касумкентсервис” ООО-диз ча­­ра авуна кIан­завай пулдин такьатар вири­ агакьарнавач. Нетижада карханада къуллугъзавайбуруз мажибарни вахт-вахтунда гуз жезвач.

Набиюлла Къарачаева Сулейман-Стальский районда кьиле тухванвай кIва­лахриз хъсан къимет гана ва региондин оператордин кIвалахдилай вич рази туширди малумарна. Ада талукь идарайриз­ авай нукьсанар вахтунда арадай акъу­дунин буйругъ гана ва кьве гьафтедилай вич абуру кьиле тухвай кIвалахрин гьахъ-гьисабриз яб гуз гьазур жедайдакай хабарна.

Гуьруьшдилай кьулухъ Набиюлла Къа­рачаев ва Нариман Абдулмуталибов Чирагъ вацIун кьерез килигна. Къейд ийин хьи, вацIа яд артух хьунин нетижада яшайишдин кIвалер ва 2011-йисуз кьерен къерехар мягькемарун патал 360 метрдиз бетондикай авунвай дамба чукIунин хата­лувал арадал къвезва. Министрди и кардикай республикадин руководстводиз хабар гун ва месэла гьялунин карда куьмек гудай рекьер жагъурун хиве кьуна.

«Лезги газет»


Всего просмотров: 29

Читайте также: