Халкьдин шаир

Мубаракрай!

И йикъара чав шад хабар агакьна: Дагъустан Республикадин Кьил В.Васильеван Указдалди (2019-йисан 30-август, 78-нумра) литературадин хи­ле ла­йихлу­ви­ле­рай ва яргъал йисарин бе­гьер­лу зегьметдай шаир, филологиядин илимрин кандидат, литературадин критик, РД-дин писателрин ­Союздин Дербентдин региональный отделенидин предсе­датель  ­Кичибег  Мусаевич  Мусаеваз  “Дагъус­тан Республикадин халкьдин шаир” ­лагьай гьуьрметдин тIвар ганва. Чна и кар адаз ри­кIин сидкьидай  мубаракзава.

Кичибег Мусаев чи литературадиз алатай асирдин 50-йисара атана. Адан къелемдикай “Цуьквер авай рекьер”, “Ракъинин нурар кIватIиз”, “Инсан ятIа”, “Гьалалвални разивал”, урус чIалал Москвада чап авур “КIанда”, “Зун инава!”, “Бахтлу хьухь, инсанар”, маса кIватIалар хкатна.

Литературадин критик яз, ада “ХХ асирдин Гомер” СтIал Сулейманан ирсиниз талукь монография ва хейлин маса затIар кхье­на­.

Лезги чIалал Даггизда и мукьвара чапдай акъуд­навай вичин хкя­гъай эсеррикай ибарат ктабдиз ав­торди “Зи ван жедатIа?” тIвар ганва. Мумкин я, ав­торди гила акъатнавай указ ва чIехи тIвар вилив хуьз­вай.

Шаирдин асул темаяр “Ватан”, “Инсан”, “Ислягьвал”, “Дуствал”, “Мублагьвал” хьтин манайри ачухарзава. “Инсанвили хуьда дуьнья!” — эзберзава ада. “Бахтлу хьухь, инсанар!” лугьуз, рахазва ам несилрив.

 

“Эхь, бахтар я: кIаниди хьун, агалкьунар, девлетар хьун…

Бахт я мичIи йифиз вуна, са спичка кьванни яна, экуьвунни…

Бахт я тIазвай садаз дарман гъана, регьят хъувунни…

Бахт я, нефс хуьз, гьарам квачиз­ яшамиш жез алакьунни…”

Хъсан тедбирар, фагьумлу ибараяр я.

                            * * *

Мубаракрай агакьнавай аршар ви!

Гьа аршари давамаррай яшар ви!

ЦIийи тIварцIи гурай цIийи  верги ваз,

Терсвилери тагудайвал тади ваз…

 

“Лезги  газетдин” редакциядин

коллективдин тIварунихъай материал

гьазурайди М.Жалилов я.


Всего просмотров: 76

Читайте также: