Халкьдин рикIера — мягькем чка…

СтIал Сулейманан 150 йисан юбилейдиз талукь мярекатар 17-майдиз йикъан сятдин 12-даз Махачкъалада, шаирдин  тIварунихъ галай багъда, адан гуьмбетдин патав цуьквер эцигунилай гатIунна.  Ана Дагъустандин­ Гьукуматдин Председателдин Сад лагьай заместитель Анатолий Къарибова, РД-дин культурадин министр Зарема Бутаевади, Дагъустандин писателрин Союздин председатель Мегьамед Агьмедова, республикадин яратмишунардай интеллигенциядин ­векилри, кьиле Нариман Абдулмуталибов авай Сулейман-Сталь­ский райондин еке делегацияди,  “Лезги газетдин”  редакциядин коллективди, студентри ва школьникри иштиракна.

Митинг Мегьамед Агьмедова ачухна ва кьилени тухвана. Вичин рахунра ада СтIал Сулейманан яратмишунрихъ, адан жавагьиррихъ асирра квахь тийидай жегьилвални дерин мана, жанлувални важиблувал авайди къейдна.

— Къенин югъ чун патал иллаки кьетIенди я — СтIал Сулейман дидедиз хьайидалай кьулухъ 150 йис тамам хьанва. Зурба шаирди Дагъустандин шииратдикай сифте яз Россия­да, Советрин Союзда  ва гьакIни дуьньядин алемда хабар гана. Адан жавагьирри Дагъ­ла­рин уьлкведин агьалийрин рикIе эбеди чка кьунва. Чаз Сулейман багьа я. Адан яратмишунри йисалай-суз цIийидаказ ванзава, — алава хъувуна М.Агьмедова.

Анатолий Къарибова лишанлу вакъиаяр — СтIал Сулейманан юбилей­ ва Дагъустандин шииратдин югъ виридаз ри­кIин сидкьидай тебрикна.

— …Советрин писателрин Вирисоюздин Сад лагьай съезддал машгьур писатель Максим Горькийди СтIал Сулейманаз “XX асирдин Гомер”  лагьа­най. Съезддин делегатри и га­фар гурлу капар ягъу­налди къаршиламишнай. И вакъиадилай кьулухъ виринра халкьдин­ манидарри, ашукь­ри… чпин ван хкажна. СтIал Сулейман абурун кIвенкIве авай.

“СтIал Сулейман кьетIен бажарагъ авай шаир я”, — кхьенай адакай чи республикадиз са шумудра мугьман хьайи писатель Николай Тихонова. Адахъ вичин хатI ва жуьрэтлу­вал ава, гьаниз килигна ам Маяковскийдихъ галаз гекъигзава. СтIал Сулейманан яратмишунри Россиядин художественный литературадин хазинада лайихлу чка кьунва. XX асирдин Гомеран эсеррал адал чан аламаз уьлкведи еке къимет эцигна. Ватандин вилик адан лайихлувилериз кутугай къимет гана. Халкьдин патай авай кIанивили, вичиз авур еке ихтибарди адакай акьалтIай бахтлу кас авуна, — къейдна Анатолий Къарибова.

СтIал Сулейманан яратмишунрин кье­тIен­вилерикай, къенин юкъузни адан эсеррин важиблувиликай Россиядин писателрин Союздин секретарь, шаир, критик, публицист, литературовед, филологиядин илимрин кандидат Иван Голубничий  рахана. Ада Россия­дин писателрин Союздин, Москва шегьердин писателрин организациядин тIварари­хъай Дагъларин уьлкведин халкьдиз шаирдин юбилей ва Дагъустандин шииратдин югъ тебрикна.

— СтIал Сулеймана вичин сад лагьай шиир 1900-йисуз кхьенай. Амма адан шииратди Советрин властдин девирда цуьк акъудна. Адалай вичин девирдин вири дердисервилер, цIийивилер, хъсанвилер кьетIен хатIу-нал­ди, бажарагълувилелди къалуриз алакьна, — къейдна мугьманди.

Митингдал рахай филоло­гия­дин илимрин доктор, Дагъустандин писателрин Союздин дарги секциядин регьбер Муса Багомедова, шаир, публицист,  РФ-дин писателрин ва журналистрин союзрин член, “Лезги газетдин” литературадин от­делдин редактор Мердали Жалилова, шаир­дин хтул Лидия Стальскаяди ва гзаф маса­бу­ру юбилей, шииратдин югъ виридаз мубаракна.

Сулейман-Стальский райондин кьил Нариман Абдулмуталибова вири районэгьлийрин тIварунихъай зурба шаирдин юбилей, ши­иратдин сувар тебрикна.

Митингдал СтIал Сулейманан птулди, мер­кездин школайра кIелзавай аялри, гьакI Сулейман-Стальский райондин Вини СтIал­рин хуьруьн юкьван школадин 11-классда кIел­завай Пирмегьамедова  Эмилияди  СтIал  Сулейманан “Вичиз вич бегенмишдаз”, “Гьар шаирдин вичин буржи”, “Гъавурда гьатин” “Дагъустан” ва маса шиирар еке устадвилелди кIелна.

Эхирдай, адет хьанвайвал, шаирдин гуьм­­бетдин патав шикилар яна.

Рагнеда Рамалданова


Всего просмотров: 16

Читайте также: