Халкьдин рикI алай манидар

Маса бязи халкьарихъ хьиз, лезгийрихъни йи­салай­-суз манидарар гзаф жезва, амма абурун арада кьетIен бажарагъ ва устадвал авай пешекарар кьериз-цIаруз ава. Манидарвилин рекьяй вини дере­жа­дин устадрикай сад халкьдин арада фадлай машгьур хьанвай, милли медениятдик пай кутазвай, вичин суьгьуьрдин хьтин сесиналди яб акалзавайбурун гуьгьуьлар хкажзавай  Жавагьир  Маиловна  Абдулова  я.

Ам 1976-йисуз Азербайжандин Къуба райондин Дигагь хуьре дидедиз хьана. Гележегдин ба­жарагълу манидар Бакуда чIехи хьана, шегьерда мектеб куьтягьна. Аял чIавалай манияр тамамарунал, ­кьуьлер авунал рикI алаз чIехи хьайи Жавагьира музыкадин мектебдани кIелна. ГъвечIи чIавуз ам кьуьлер чирунал, кьезил атлетикадални машгъул хьана.

Музыкадин мектеб тафаватлудаказ куьтягьайдалай кьулухъ ам 2000-йисуз Асеф Зейналлидин тIварунихъ галай музучилищедин манияр тамамарунин отделенидик экечIна. Манияр тамамарунин устадвал, тежриба ва алакьунар хьанвайтIани, Жавагьир музыкадин рекьяй колледжда къачур чирвилерал разивална акъвазнач. 2003-йисуз ам Азербайжандин гьукуматдин милли консерваториядик экечIна.

1999-йисалай 2012-йисалди ада гьукуматдин нафтIадин тешкилатдин “Ватан” ансамблдик кваз манияр тамамарна. И девирда Жавагьира ругуд йисуз­ манийрин тарсар гудай муаллим язни кIвалахна.

2005-йисалай ам “Сувар” ансамблдин манидар я. Яб акалзавайбурун арада вичин бажарагълувилелди еке машгьурвал, гьуьрмет къазанмишнавай манидарди къе “Сувар” ансамблдал дамахзава. Вичин яратмишунарни агалкьунар, халкьдин патай къазанмишнавай кIанивални гьуьрмет и ансамблдихъ галаз алакъалу ийизва.

“Колледжда кIелдайла, заз чи виридан рикI алай Седакъет Керимовадин юбилейдин мярекатдик иштиракдай бахт хьана. Гурлу мярекатда санал кIелза­вайбурухъ галаз чна тебрикдин мани тамамарнай”, — рикIел хкизва Жавагьира.

Алакьунар ва хъсан сес авай манидардикай хуш атай Седакъет Керимовади адаз вичин “Сувар” ансамблдик экечIун теклифна. Лезги ансамблда хайи чIалал манияр тамамарунин мурад фадлай рикIе авай Жавагьира еке гьевесдивди разивал къалурна. Са тIимил чIавалай шаир, композитор Седакъет Керимовади цIийи манидардиз “Дидедин чIал” тIвар алай мани кхьена. Къейд ийин, арадал атай цIийи мани сифте сеферда яз Москвадин Кремлдин сегьнеда тамамарна. Яб акалзавайбуру лап хушдиз кьабулай маниди Жавагьир машгьурна. “Сувар” ансамблди ам агалкьунрин гурарай йисалай-суз виниз хкажна. Манияр тамамарунилай гъейри, 2005-йисалай ада лезги, урус ва азербайжан чIаларал ансамблдин концертарни кьиле тухузва.

Жавагьир Абдуловади тамамарзавай гзаф манияр Седакъет Керимовади кхьенвайбур я. Кьилди къачуртIа, адан репертуардик квай “Чан дидедин”, “Ватан”, “Дидедин чIал”, “РикIин дуст” манияр яб акалзавайбуру хушдиз кьабулнава, интернетда абурухъ яб акалзавайбурун кьадар тайинариз жедач. Бажарагълу манидарди анжах вичиз хас тир устадвилелди халкьдин маниярни тамамарзава.

Республикадин, вири халкьарин дережайра кьиле фейи хейлин конкурсра, фестивалра ада агал­кьунралди иштиракзава. Ада Азербайжандин машгьур композиторрин маниярни тамамарзава.

Дагъустандин лезги композиторрикай Жавагьира Мегьамед Гьуьсейнован, Маина Абдулмутали­бовадин алакьунрал гьейранвалзава. М.Абдулмуталибовади Сажидин Саидгьасанован чIалариз  Жава­гьир патал цIийи манини кхьенва.

Яратмишунри цуьк акъуднавай манидардихъ 10 чIалал манияр тамамардай алакьунар ава. 2019-йисуз Дербент шегьерда адан концерт гурлудаказ кьиле фена. Къуй устаддихъ гележегдани агалкьунралди милли медениятдиз къуллугъдай мумкинвилер хьурай!

К. Къалажухви


Всего просмотров: 274
Подпишитесь на наши каналы:

Читайте также:


Новости партнеров