Халкьдин духтур яз рикIел алама

И мукьвара жуван куьгьне чарарикай заз рагьметлу Шефиев Агъамегьамед духтурдин шикил жагъана. Ахцегь районда гзаф йисара хирургвиле кIвалахай аскIан буйдин, уьтквем, чин ачух, къени къилихрин ам чIехи несилдин рикIел хъсандиз алама. Инсан невейрин, несилрин рикIел аламай кьван гагьда ам кьенвач лугьуда…  Ингье чи суьгьбет вичин вири къуватар, уьмуьр халкьдин сагъламвилин къуллугъда эцигай гьа и касдикай я.

Шефиев  Агъамегьамед 1927-йисуз Ахцегьа зегьметкеш кесиб хизанда дидедиз хьана. Адан буба Султан­ лежбер тир. 1915-йисуз Бакудай рухсатдиз хтай фялейрихъ галаз амни Бакудиз наф­тIадин мяденра кIвала­хиз фена. Инкъилабдин гьерекатдик экечIна. Яшлу кьилихъ кIел-кхьин чирна, политикадин рекьяй савадлу хьана. Гуьгъуьнлай РКП (б)-дин Бакудин комитетдин член, яру партизан яз, адал партиядин тешкилатчивилин жавабдар къул­лугъар ихтибарна. Мегьрибан диде Къизилгуьл 1930-йисуз азардикди ва буба Султан 1937-йисуз, къуллугъдал бедбахтвилин дуьшуьшдик акатна, кечмиш хьана. ГъвечIи кьуд аял, кьве стхани кьве вах (абурукай чIехиди Агъамегьамед тир) Халисат бадедин гъилел аватна, ада кIвачел  акьулдна.

1933-44-йисара Ахцегь къеледа етимханада ва школа-интернатда мектебар агалкьунралди кIелай Агъамегьамед, 1944-йиса­лай комсомолдин член-активист, Агъасиеван тIварунихъ галай колхозда кIвалахиз фена. Рагьметлу бубадин веси (Къизилгуьл дидедиз куьмек тахьана акур бубадин мурад хцикай духтур хьун тир) кьилиз акъудун патал зегьметдикай азад декьикьайра Агъамегьамед ктабар гваз хелвет жедай. 1946-йисуз хъсан къиметралди имтигьанар вахкана, ам Дагмединститутдик экечIна. 1948-йисуз чешнелу студент, комсомолдин кIвалахдин активист партиядин жергейриз кьабулна. Им еке ихтибарвал тир, и ихтибардиз ам вафалуни хьана.

Яру дипломдалди институт акьалтIарай жегьил пешекар духтурар авачир Рутул райондиз ракъурда. 1951-йисалай 1954-йисан январдалди гьакъисагъвилелди ана райздраввиле ва гьа са вахтунда хирургвиле кIвалахна. Алава яз, са йисуз райондин санэпидстанциядин кьилин духтурвилин везифаярни тамамарна. Югъ-йиф, ял ядай югъ-рухсат талгьана, балкIандаллаз ва я яхдиз, гъиле дарманринни алатрин яру хаш алай чемодан аваз, дагълух, гьатта рехъ авачир хуьреризни тади куьмекдиз физ хьайи ахцегьви жегьил духтур яшлу инсанри къени хушдиз рикIел хкизва.

1954-йисан июлдиз ам Ахцегьиз хирургвиле хтана. 1957-1960-йисара Ахцегь райондин санэпидстанциядин кьилин духтурвиле ва 1960-йисан 8 — сентябрдилай хирургвиле, гьакI райбольницадин кьилин духтурдин азарлуяр сагъарунин рекьяй заместителвиле кIвалахна. И къуллугърал Шефиев вини дережадин пешекар, гьуьрметлу, мергьяматлу инсан хьиз машгьур хьана. Коллективдин ва халкьдин арада лайихлу гьуьрмет, авторитет къазанмишна. Ада 2 агъзурдалай виниз гьар жуьре операцияр авуна.

Ахцегь райондин райздрав (1956-1957-йй.) ва 1954-йисалай Дагъустандин хирургрин обществодин член яз, А.С.Шефиева Ахцегьа республикадин аялрин кардиологиядин санаторий ва районрин чахуткадиз акси уртах больница ачухун тешкилна. Къуллугъдин четинвилиз ва жавабдарвилизни килиг тавуна, духтур халкьдин хийир-шийирдикайни хкечIдачир. Артухлама, ада вичин хивез райздравдин сифтегьан парторганизациядин пропагандиствилин, хуьруьнэгьлийрин сагъламвал хуьнин рекьяй халкьдин университетдин ректорвилин везифаярни къачунвай. 1957-1960-йисара Шефиев Ахцегь исполкомдин депутат, 1956-1973-йисара КПСС-дин Ахцегь райкомдин бюродин членни хьана. Вири и крар обществодин хушбахт гележегдихъ инанмиш халис коммунистдилай хъсандиз кьиле тухуз алакьзавай. Гьелбетда, духтурвилин ва общественный уьмуьрдин кIвалахра еке куьмек адаз, далу пад багълу я лугьурвал, уьмуьрдин вафалу юлдаш, Ахцегьрин 1-нумрадин школада урус чIаланни литературадин муаллим Гьавизат Макатова хьана.

Разивилелди лугьун, Агъамегьамед Султановичан зегьметар гьукумдарризни акуна: ам “Знак Почёта” ордендиз, “За доблестный труд”, “Ветеран труда” медалриз ва райондинни республикадин дережадин гьуьрметдин грамотайризни къиметлу пишкешриз лайихлу хьана. Халкьдин духтур ва тешкилатчи (адаз гьуьрметдивди гьакI лугьузвай) 1993-йисан июлдиз 66 йисан яшда аваз рагьметдиз фена. Адан экуь къамат чидайбурун рикIера  яргъал йисаралди амукьда.

Дашдемир  ШЕРИФАЛИЕВ


Всего просмотров: 85
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире