Хайи чIалаз талукь мярекат

20-февралдиз Хасавюрт райондин Къурушрин хуьруьн 1-нумрадин мектебда­ “Чахъ чи хайи чIал амай кьван, сагъ я лез­ги халкь” ли­шандик кваз мярекат кьиле фена. Ана мектебдин директорди, “Къурушрин сес” газетдин, хуьруьн ктабханадин  къуллугъчийри, хуьруьн интеллигенциядин векилри, муаллимри, аялри иштиракна.

Мярекат мектебдин директор Ислам Гьажи­метова ачухна. Са декьикьада кисна акъва­зуналди, иштиракчийри мукьвара рагьметдиз фейи халкьдин артист, телеведущий Иса­мудин Агьмедов рикIел хкана.

Ахпа рагьметлу шаир Лезги Арифа кхьей, Тар­­лан Мамедова манидалди тамамарзавай “Къу­рушар” гимндилай мярекатдик кьил ку­туна­­.­

Директорди гаф муаллим Гьажи Къазиеваз гана. Ада миллет патал хайи чIал виридалайни багьа ивиррикай сад тирди, ам хуьнин, гележегдин несилрал агакьарунин везифа гьар садан хиве авайди лагьана.

Мярекатдал Вердихан Вердиханов, Эмирхан Эмирханов, Азим гьажи Панагьов, Эмирбег Алискеров, Агъали Закиров, Рена Назаро­ва, Сейфуллагь Гьасанов, Элескер Мамедов, “Къурушрин сес” газетдин кьилин редактор Муса Агьмедов, хуьруьн ктабханадин заведующий Сулмаз Дадашева рахана. Абуру чIал хуьнин, жегьилри чIал чирунин карда квел амал авун лазим ятIа, гьадакай ихтилатна. Жуван чIал кIвале, хизанда, миллетдин ве­килрин арада гьар са лезги патал гьамиша рахуннин кьилин алатдиз элкъуьн чарасуз тирди къейдна.­

Хайи чIалаз талукьрнавай мярекатдин сергьятра аваз “Зи играми лезги чIал” ктабрин выставкани тешкилнавай.

Мярекатдал ученицаяр тир Альбина Фаталиевади, Самира Казимовади, Хадижа Гьуь­сейновади, Садина Адигуьзеловади Зи­янт Селимхановади, Мадина Эмировади, Ай­на Магьмудовади, Эльза Заловади, Гуьл­бес Ашуралиевади шиирар кIелна. Абур фасагьатдаказ кIелунай аялриз грамотаяр гана.

Чи мухбир


Всего просмотров: 87
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире