Хайи чIалариз – шегьре рехъ

РФ-дин Госдумада хайи чIалар чирунин жигьетдай цIийи проект гьазурнава. Къейд ийин хьи, сифтегьан проектди Россиядин регионра милли чIалар анжах аялрин ва абурун диде-бубайрин хушуналди чирдай мумкинвал гузвай. Ам­ма уьлкведин са жерге республикайра ихьтин къанун кьабулуниз аксивал къалурайдалай кьулухъ депутатар цIийи проект гьазуруниз мажбур хьана.

Мукьвара Госдумада кьиле фейи заседанидал образованидин ва илимдин Комитетдин председатель Вячеслав Ни­конова къейд авурвал, проектдик мектебра хайи чIалар гунин махсус концепция арадал гъунин теклиф кутада. Идалай гъейри, проектдин вири терефар тамамдиз веревирд авун патал хайи чIа­ларин къанундиз талукь вири актар кьвед лагьай сеферда кIелиз гатIун­дал­ди гьазурна акьал­тIа­рун лазим я.

“Единая Россия” фракциядин руководителдин сад лагьай заместитель Андрей Исаева алава хъувурвал, мектебрин программайра хайи чIалар чирун чарасуз амукьда. Аяларни хайи чIалан предмет чируниз мажбури жеда. Анжах хайи чIаларикай гьи чIал чирдатIа аялри, я тахьайтIа, абурун диде-бубайри хкяда.

Хайи чIалар чируниз талукь проектдик дегишвилер кухтунилай гъейри, шад жедай мад са кар ава: федеральный дережада аваз хайи чIалариз куьмекдай махсус Фонд арадал гъизва. В.Никонован гафаралди, Фонд хайи чIаларин илимдин, хайи чIаларай ва литературайрай учебникар, пособияр, программаяр гьазурунин, абур образованидин федеральный госстандартрал бинеламиш хьана экспертиза авунин ва са жерге маса месэлайрал машгъул жеда.

Хайи чIалариз талукь цIийи проект тестикьардайвал документ алай йисан 19-июндиз Госдумадин депутатрал агакьарда. Гуьгъуьнлай РФ-дин регионра цIийи проектдиз талукь гьихьтин фикирар аватIа чирун патал ам уьлкведин ви­ри субъектриз рекье твада.

“Лезги газет”


Всего просмотров: 197

Читайте также: