Х.Н. Мирземетов

Алай йисан 25-ноябрдиз чи арадай Калмыкия Республикадин сад лагьай Игит, Ленинан, Октябрдин Инкъилабдин, Зегьметдин Яру Пайдахдин, СССР-дин Халкьарин Дуствилин орденрин сагьиб, чи халкьдин баркаллу хва Мирземетов Ханбуба Надирович акъатна.

Х.Н. Мирземетов 1933-йисуз До­къузпара райондин Къурушрин хуьре малдаррин хизанда дидедиз хьана. Аял чIавалай ам чубандин пе­­шедив вердиш тир. Гележегда ада вич хипе­хъанвилин рекьяй СССР-дин ­ви­ри республикайризни машгьурна. 1969-йисуз Х.Мирземетов сифте яз ВДНХ-диз фена ва ана вичин сад ла­гьай къизилдин ме­даль къазанмишна. Гуьгъуьнлай адакай мад кьуд сеферда ВДНХ-дин иштиракчи хьана: 1971, 1975, 1980-йисара — гимишдин, 1974-йи­суз къизилдин медалриз лайихлу хьана. Х.Мирземетов КПСС-дин XXV съезддин делегатвилени хкянай.

1987-йисуз акъатай “Советские профсоюзы” журналдин 20-нумрада­ Калмыкия Республикадин “Чагорта” сов­хоздин старший чубан Ханбуба Мирземетова кIвалахдин рекье къазанмишнавай агалкьунрикай еке макъала чапнай. Ана ада 30 йи­са­лайни гзаф вахтунда намуслудаказ чIуг­ваз­вай зегьметдикай, хипе­хъан­вал вилик тухунин сирерай кьил акъуд­завай къайдайрикай, майишатди тайинарнавай планар артухни алаз тамамарзавайдакай кхьенвай.

Ханбуба Надировичан виридалайни багьа ядигар Калмыкиядин Президент Кирсан Илюмжинован къул алаз адан гъиляй къачур, къизилдин къене багьа къашар (бриллиантарни рубинар) авай Игитвилин Орден хьанай. Адаз и еке тIвар тебри­киз, кьве сеферда СССР-дин Игит, летчик-космонавт В.Быковский, РФ-дин Госдумадин депутат Р.Абдулатипов, РФ-дин хуьруьн ма­йишатдин министр Г.Кулик, Да­гъустандин Госсоветдин Председателдин заместитель Б.Агьмедов ва жавабдар маса ксар атанай.

Х.Н.Мирземетова са шумуд йисуз хуьруьн майишатдин рекьяй Калмыкиядин Президент Кирсан Илюмжинован куьмекчи яз кIвалах­най. Гьеле гьа вахтунда К.Илюмжи­нова Х.Мирземетоваз Россиядин Игитдин тIвар  гун патал документар Президент Б.Ельцинан Секретариатдиз ракъурнай.

Х.Н.Мирземетов вичел тапшурмишай гьар са кардив жавабдарвилелди, намуслувилелди эгечIна. Гьавиляй ам гьахьтин кьакьан дережайривни агакьна.

Ханбуба Мирземетов, баркаллу зегьметкеш хьиз, чIехи, тербиялу хи­зандин иесини тир. Ада вичин уьмуьр­дин юлдашдихъ галаз са­нал­ ирид аял зегьметдал рикI алаз чIехи авуна.

“Лезги газетдин” редакциядин коллективди Ханбуба Надирович Мирземетован хизанриз, мукьва-кьилийриз, дериндай хажалат чIу­гу­налди, башсагълугъвал гузва.  Аллагьди рагьмет гурай вичиз!

 

 


Всего просмотров: 64
Подпишитесь на наши каналы:

Читайте также:


Новости партнеров