Гъуьлягъди кIасайла…

ЦIи, малум тирвал, гзаф кьурагь я. Гьавиляй ингье гъуьлягъар гзаф пайда хьанва. Абуру кIасай дуьшуьшар тIимил туш. ИкI, Хасавюрт райондин Ленинаул хуьряй тир 4 йиса авай гада гъуьлягъди кIасна. Агъудиз акси раб (антидот) вахтунда янатIани, аял лап четин гьалда авайвиляй Хасавюртдин ЦГБ-дай вертолётда аваз Махачкъаладиз, республикадин аялрин клинический больницадиз (ДРКБ)  агакьарунин къарар кьабулна. Духтурривай ам къутармишиз хьана, сагъ хъхьанва. Муькуь дуьшуьшда Кьасумхуьрелай тир 42 йисан яшда авай итим кIасна. Райондин больницада адаз агъудиз акси раб (антидот) яна. Амма гьал са акьван хъсанди туширвиляй амни Махачкъаладиз агакьарна. Адан гьални хъсан хьанва. 

Республикадин здравоохраненидин министерстводин пешекаррин гафарай малум хьайивал, республикадин медицинадин идарайра агъудиз акси рапар  бес кьадарда ава. Абуру къейдзавайвал, гъуьлягъди кIасай кас­диз тади гьалда (30-60 декьикьадин вах­тун­да) раб ягъунихъ еке метлеб ава. Геж хьайи­тIа, чIуру гьалар арадал атун мумкин я —  агъуди бедендин вири органар харапIзава.

Чир хьун лазим я хьи, гъуьлягъди кIасай чкадал жгут эцигун герек туш — ада якIар (ткани) рекьида, чIурда. Хер цIалди кана, вахт арадай фейила, ам атIана ва иви акъуднани виже къведач. Агъу ивидик кваз бедендиз фад чкIизва. КIасай сифтегьан 10 декьикьада, мумкинвал аваз хьайитIа, банкадин куьмекдалди (далудиз банкаяр ядай саягъда) агъудин са пай хьайитIани акъудиз  чалишмиш хьана кIанда. Инсан жезмай кьван фад медидарадиз агакьариз тади ая. Чуьлда, са­ла, багъда мукъаятвал хуьх!

«Лезги газет»


Всего просмотров: 25

Читайте также: