Гиппократан кьинез вафалуди

Сулейман-Стальский райондин 90 йисан юбилей къейд авунин сергьятра аваз гзаф йисарин гьакъисагъ зегь­метдай Дагъустан Республикадин Гьу­куматдин Председатель  Артем  Здунова ва адан заместитель  Рамазан  ­Жафарова са шумуд касдив шабагьар вахкайдакай “Лезги газетда” хабар ганай. Абурун арада райондин центральный азарханадин (ЦРБ) старший медсестра ­Маисат  Балихановани  (ши­килда)  ава. Шабагь  вахкудайла, Артем Зду­нова ва Рамазан Жафарова,              М.Балихановадиз тебрикдин келимайрихъ галаз сад хьиз  кIвалахда мадни еке агал­кьунар хьана кIанзавайди лагьана.

Маисат Балиханова (Садыкьова) вичин пешедал — медицинадин рекьяй къуллугъ авунал рикI алай, масадан дердиникай хабар кьадай, ширин мез, ачух рикI авай инсан яз, чаз фадлай хъсандиз таниш я. Ам 1968-йисуз вичиз гьахълудаказ алимринни шаиррин макан лугьузвай Агъа СтIалдал дидедиз хьана. Хуьруьн юкьван школада 8-класс лап хъсан къиметар аваз акьалтIарай руш гъвечIи чIавалай вичин рикIе авай мурад кьилиз акъудун патал Каспийск шегьердин медучилищедик экечIна. 1985-йисуз, “медицинская сестра” пешекарвал къачуналди, училище акьал­тIа­рай Маисат райондин центральный азарханадиз кIвалахал хтана.

— Сифте райондин азарханадиз атай югъ зи рикIел хъсандиз алама. Зун ина кьилин духтур Мегьамедрасул Гьажиевич Аллагьвердиева хушвилелди кьабулна ва хирургиядин отделенида медсестравиле кIвалахун теклифна. Гьа йи­къалай инихъ жуван кьисмет ЦРБ-дин гьуьрметлу, дуствилин коллективдихъ галаз алакъалу авунал за шадвалзава, — лугьузва Маисат Мегьамедгьадиев­нади.

М. Балихановади хирургиядин отделенида кIвалахай са тIимил вахтунда вич хъсан чирвилер авай пешекар яз къалурна. И кар себеб яз, идарадин кьиле авай ксари ам (1986-йисан сифте кьилера) садакай масадак  акатдай азаррин отделенидиз кIвалахал ракъурна. Идахъни ви­чин себеб авай: а йисара садакай масадак акатдай азаррикди начагъбурун кьадар гзаф, аялар кьейи дуьшуьшарни хьанвай. Мадни, цIуд йисаралди капиталнидаказ ремонт тавунвай отделенида медицинадин къуллугъчийриз кIва­лах­дай шартIар авачир. Аниз пешедал рикI алай, хъсан чирвилер авай, кIвалах алакьдай пешекарар герек тир. ЦIийи чкадани Маисат Балихановади вичин хиве авай везифаяр намуслудаказ ­кьи­лиз акъудиз хьана. Къенин юикъуз, ви­ни­дихъ къейднавайвал, и отделенида старший медсестра яз кIвалахзавай ада ко­ллективдин, азарлуйрин, агьалийрин патай гьуьрмет, кIанивал къазанмишнава.

—  Маисат  Мегьамедгьадиевнадикай  рахадайла, завай лугьуз жеда хьи, ам вичи хкянавай пешедиз ва Гиппо­кратан кьинез кIевелай вафалу кас — медсестра я, — лугьузва кIвалахдин 40 йисан тежриба авай, Дагъустан Респуб­ликадин ла­йихлу духтур Саид Саидова. — Садакай ма­садак акатдай  азаррин отделенида чна санал кIвалахиз 33 йис я. Отделени­дин кIвалах — хъсан, районда садакай масадак акатдай азаррин кьадар тIимил хьуник Маисатан еке пайни ква.

Чаз райондин центральный азар­ханада лагьайвал, М.Балихановади ­неинки вичин кIвалахдин чкадал, гьакI хуьрерани садакай масадак акатдай ва маса хаталу азаррин вилик пад кьунин карда активви­лелди иш­тирак­за­ва, халкьдин арада и кардиз талукь кIва­лах ту­хузва. ИкI, Ма­и­­­са­та Курхуьрел, КIвар­­ча­гъа, Кьулан СтIал­дал руфунин тиф, “А” гепатит азаррин вилик пад кьун патал тухвай ва ма­са серенжемра иштиракна.

Пешедин устад, тежрибалу мед­­­сес­тра яз, М.Ба­­ли­хановади районда ва Махачкъалада медицинадин къуллугъчийрин конференцийра, семинарра иштиракна. Анра вичин тежрибадикай рахана, лекцияр кIелна. “Медицинадин лап хъсан медсестра”, “Пешедай лап хъсанди” лишандик кваз тухвай конкурсрани Маисат Мегьамедгьадиевнади са шумудра кIвенкIвечи чкаяр кьуна.

Намуслу зегьметдай М. Балихановадиз Дагъустан Республикадин здравоохраненидин министерстводин, ЦРБ-дин кьилин духтурдин патай са шумудра гьуьрметдин грамотаяр гана, чухса­гъул малумарна.

Вичин пешедай руьгьдин таъминвал аквазвай М.Балихановадикай кхьидайла, зи рикIел къадим девирдин меди­цинадин “шагь” Авиценнади лагьай гафар хтана: “Духтурдихъ катран вилер, рушан гъилер, еке акьул-камал, асландин рикI хьана кIанда”. И гафар Маисат Мегьамедгьадиевнадиз вири терефри­хъай хас я.

РикI алай пешеди хьиз, М. Балихановадиз гьуьрметлу, марифатлу хизандини руьгьдин таъминвал гузва. ИкI, райондин агьалийриз яшайишдин жигьетдай къуллугъдай управленида кIвалах­завай уьмуьрдин юлдаш Ибадулагь Бедулагьовичахъ галаз санал Маисат Мегьамедгьадиевнади кьве веледдиз чешнелу тербия гана, уьмуьрдин шегьредал акъудна. ИкI, руш Заира дидедин рекьеваз фена — Саратовдин медуниверситет акьалтIарай ада Москвада участковый терапевт яз кIвалахзава. Пермь шегьерда высший военный институт акьал­тIа­рай гада Заур алай вахтунда Иркутскдин областдин Ангарск шегьерда кьетIен метлеб авай полкуна автомобилрин взводдин командир я.

“Дагъустан Республикадин здра­воохраненидин лайихлу работник” ла­гьай­ гьуьрметдин тIвар мубарак авуналди, чаз Маисат Балихановадихъ мягькем сагъламвал, хизанда хушбахтлувал, кIва­лахда мадни еке агалкьунар хьана кIанзава.

Хазран Кьасумов


Всего просмотров: 52

Читайте также: