Гегьенш субботникар

Республикадин кьил В. Васильеван Чарче къалурнавай тапшуругъар умуьрдиз кечирмишунин сергьятра аваз, къе, 13-апрелдиз, Кьурагь районда гегьенш субботник кьиле фена. Идакай «Лезги газетдиз» райадминистрациядин пресс-къуллугъди хабар гузва.

Серенжемдин вахтунда саларинни никIерин сергьятар, идарайрин дараматрихъ галай гьаятар ва шегьре рекьин къерехрив гвай мулкар михьунин кIвалахар тешкилна. Субботникда райондин кьил Замир Азизова, РД-дин хуьруьн майишатдин ва недай суьрсетдин министерстводин правовой управленидин начальникдин заместитель Руслан Агьмедова иштиракна.

Субботникдин иштиракчийри агъзурни вад вишелай гзаф цIийи къелемар акIурна, гьа жергедай яз вад виш къелем емишринбурни. Райондиз гьахьдай чкадилай КIирийрин спортдин интернат-мектебдин дараматдал кьван давам жезвай республикадин шегьре рекьин къерехда гьамиша къацу яз амукьдай тарарни цана. Ихьтин къелемар и мектебдихъ галай паркунин мулкарани цана.

Хуьрерин жемиятдин чкаярни, кимерни хъсан гьалдиз хкана, зирзибилрикай михьна. Хуьрерин къенепатан рекьерин къерехра авай путулкаяр, пакетар ва маса жуьреба-жуьре зирзибилар кIватIна. Жемиятдин чкайра авай тарарин танариз кирежарни яна.

Санлай къачурла, гатфарин гегьенш субботникда райондин 5 агъзурдалайни гзаф агьалийри иштиракна. Ихьтин серенжемар ЧIехи Гъалибвилин югъ къведалди мадни тешкилдайвал я.

Къейд ийин, республикадин муькуь районрани шегьерра хьиз, 13-апрелдиз гегьенш субботникар Сулейман-Стальский, Ахцегь, Докъузпара, Мегьарамдхуьруьн районрани тешкиллувилелди кьиле фена.

 «Лезги газет»


Всего просмотров: 10

Читайте также: