Гатфарин призыв – 2018

3-апрелдиз РД-дин военный комиссариатда Дагъустандин военком Даитбег Мустафаева­ республикадин СМИ-рин векилрихъ галаз­ 2018-йисан гатфариз жегьилриз армиядин жергейриз эвер гунин месэлайриз талукьарнавай пресс-конференция кьиле тухвана.

1-апрелдилай Россияда гатфарин призыв башламиш хьанва. Ам 15-июлдал кьван давам жеда. Аскерри са йисуз къуллугъда. И гатфариз Россиядин Яракьлу Къуватрин жергейриз  128 агъзур кас жегьилар фида.

Военкомди къейд авурвал, Дагъустандай армиядин жергейриз гатфарин призывдин вахтунда  1350 жегьил рекье твада. Алатай йисан гатфарин призывдив гекъигайтIа (1950 кас), кьадар тIимил хьанва. И карни эхиримжи вахтунда контрактдин бинедаллаз къуллугъзавай аскеррин кьадар гзафарунихъ  галаз алакъалу я.

– Армиядиз  жегьилрин сад лагьай десте апрелдин кьвед лагьай паюна фида. Дагъус­тандин призывникар Россиядин армиядин вири военный округриз рекье твада. Чи аскерри кьураматдин, военно-космический, ра­кьун рекьин ва маса частара къуллугъда.  Ар­миядин жергейриз тухудайбур хкядайла, сифтени-сифте яшариз чIехи, чпихъ кьилин, технический кьилин  ва махсус пешекарвилин образование авай, военно-учетный пешеяр (ашпаз, водитель, крановщик, фельдшер, медбрат) къачунвай, ДОСААФ-дин школа акьалтIарнавай жегьилриз артуханвал ава. Алай йисуз армиядиз физвайбурукай 1000 жегьил C, D, E категориядин водителдин­ пеше гвайбур жеда,  – лагьана военкомди.

Д.Мустафаеван гафаралди, эхиримжи йи­сара армияда аскерар патал еке дегишвилер арадал атанва. Адетдин аскеррин кьадар къвердавай тIимил жеда, контрактникрин кьадар гзафарда. Алай йисан гатфарин призывда мад са цIийивал хьанва. Военкомди лагьайвал, алатай йисара, сагъламвал се­беб яз, медкомиссиядин къарардалди запасда тунвай, гьеле 27 йис  тахьанвай жегьилриз сагъламвал цIийи кьилелай ахтармишайдалай кьулухъ армиядиз къуллугъиз фи­­дай ихтияр ганва. Идалай гъейри, армиядин жергейриз физвай жегьилрин вилик профессионально-психологический жигьетдайни кIеви истемишунар эцигнава. И карни къайда-низам чIур­дай, чпи-чпиз къаст ийидай ниятар авай хьтин, дустагъра ацукьна хтанвай же­гьилар армиядин жергейриз акъат тавун патал ийизва. Военкоматра авай медкомиссийрик  духтур-нарколог тахьуниз килигна, абурук во­енный поли­циядин къуллугъчияр кутунва. Абурувай жегьилрин арадай наркоманар чириз жезва.

Военкомди лагьайвал, армиядиз тухузвай жегьилриз, гьеле кIватIдай пунктуна амаз, чеб къуллугъиз физвай частарикай лугьузва ва абур гьар частунин  алукIдай махсус пар­талралди, недай суьрсетдалди таъминарзава. Къуллугъзавайбуруз къулайвал артух хьун патал абур гигиенадихъ галаз алакъалу шейэр авай махсус сумкайралди  таъминарда. Гьар са призывникдиз электронный къайдада карта туькIуьрда.

Д.Мустафаева къейд авурвал, республикадин военкоматдин шегьеррин ва районрин отделенийра жегьилар армиядиз желб авунин барадай герек вири серенжемар истемишзавай къайдада кьиле тухузва.

Гатфарин призывдин вахтунда чи лезги  районрин гьар са военкоматди 30 жегьил ­армиядин жергейриз  рекье твада.

РД-дин военкомди малумарайвал, Да­гъустандин жегьилар гьар йисуз контрактдин бинедаллазни къуллугъиз физва, абурун кьадар къвердавай гзаф жеда. Алай йисуз республикадай 1300 контрактникди Россиядин Армиядин жергейра къуллугъда. Абурукай 300 кас  гьеле сад лагьай кварталда армиядиз рекье тунва.

Эхирдай Д.Мустафаева 8-апрель военко­матрин пешекарвилин сувар тирдакай, алай йи­суз 100 йисан юбилей къейдзавайдакай, Да­гъустанда и сувариз талукьарнавай мяре­кат 12-апрелдиз кьиле тухудайдакай ла­гьана ва СМИ-рин векилрин суалризни жавабар гана.

Къуй чи аскерриз ислягь гьалара къуллугъдай ва сагъ-саламатдиз  диде-бубайрин патав  хкведай мумкинвал хьурай.

Земфира Бабаева


Всего просмотров: 72

Читайте также: