Гьамиша жанлу Шарвили

Ахцегьрин мугьманперес чили гъилевай йисуз 20-сеферда “Шарвили” эпосдин суварин гзаф кьадар мугьманар ва дустар къаршиламишна. Ам, гьа­къикъатдани, Дагъустандин халкьа­рин садвилин чIехи мярекатдиз элкъвенва. “Гьар йисуз лезгийрин игитвилин “Шарвили” эпосдин сувар кьиле тухун — им гележегдин несилриз веси я”, — ла­гьанай 2000-йисуз  эпосдин сифте сувар ачухдайла адан кьилин тамада Имам Яралиева.

Гьа икI и сувари чи халкьдин руьгьдинни ахлакьдин ивирар арадал хкизва, чи садвал ва тупламишвал, тарихдин ва гележегдин вилик жавабдарвал артухарзава, эпосдин игитвилелай чи йикъарин игитвилел элячIунин рехъ тайинарзава.

Къейд ийин: гьар йисуз “Шарвили” эпосдин суварин жуьреяр ва мана цIийи, адан иштиракчийрин ва мугьманрин кьадар лагьайтIа, артух жезва. ЦIуд­ралди дуствилин муькъвери къадим Ахцегьар уьлкведин гьар жуьре пипIерихъ галаз алакъалу ийизва.

И юкъуз суварин къайдада безетмишнавай Ахцегьрин хуьрел инсанрин, вишералди мугьманрин ва аялрин шадвилин ванер жезва. Къуй чи халкь садзавай ва тупламишзавай Шарвилидин жанлу руьгь асирра яшамиш хьурай!

Нариман Мамедов


Всего просмотров: 32

Читайте также: