Гъалибчийриз  баркалла!

Ватандин ЧIехи дяведа Ахцегь райондин Ялцугърин хуьряй 130-дав агакьна кьегьалри иштиракна. Абурукай 65 касди Ватан патал чанар къурбандна. Дяведа хьайи стхайрин арада, гъалибвал къачуна хтай, 9 кас офицер авай.

Ватан хвейибур, алатдач  куьн рикIелай,

Тарифдин гафар я квез чи мецелай.

Несилриз куьн игитвилин чешне я,

Вирибуруз руьгьдин чIехи чешме я.

 

Алибег

Алибег

Гвардиядин подполковник уьтквем Алибег,

Дяведа куьруь авуна на душмандин кек.

Дяведай хтайла, чIехи тир Россияда

На агалкьунар къалурна ислягь зегьметда.

 

Жафер

Жафер

Дагъдин лекь тир вун мукалай  къарагъай,

Гьуьрсуьналди къирмишзавай душманар.

Шарвилидин къамат акваз ахварай,

Рази тир валай азад хьайи инсанар.

 

Мегьемет

Мегьемет

Пазанрин сихилдикай тир Мегьемет,

ЧIехи гъалибвилик ква ви зегьмет.

Полковникдин чиндал кьван атана,

Хур орденрай, медалрай ацIана.

 

Байрам  Байрамов

Байрам

Хуьре тир адлу харат устIар.

Фашистрин кукIварна куьне мастIар.

Берлиндал кьван фена, ротадин командир яз,

Ватандиз вун хтана гваз шабагьар.

 

Агъаширин

Агъаширин

Медицинадин капитан Ширинов Агъаширин,

ТIебии илимрин кандидат, акьулдиз дерин,

Гъалибвилик пай кутур ваз аферин!

45-йисуз Берлинда кьисмет хьана ваз кьин.

 

Буба  (Селягь)

Селягь

Пуд стха — Ленинграддин фронтда пуд кьегьал

Авай, фашистриз къизгъин ягъунар кьаз.

Дяведилай кьулухъ, тевгьена яргъал,

Партийный кIвалахрал хьана ам алаз.

 

Мегьарам

Мегьарам

Ракьун къапуна ханай вун Лейли дидеди,

Гьулдан хьиз кьил кIеви хьуй лугьуз.

Игит хьиз вун ахтармишнай дяведи,

Хур орденрив ацIанвай хтанвай чIавуз.

 

Гьамидуллагь

Гьамидуллагь

Дяведа вич тир офицер.

Душманар кукIварна, пехъи  кицIер

Гъалибвал къачуна хтана,

Мад мектебда хъхьана муаллим.

 

Тажидин

Тажидин

Дяведилай вилик гузвай вуна азанар,

Ихласдиз, диндиз къуллугъ ийиз,

Женгера терг ийиз хьана шейтIанар,

Гьич кIусни абуруз инсаф тийиз.

Сулейман Пашаев


Всего просмотров: 70
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире