Гьайванрин алемда

“Лезги газетдин” алай йисан 25-нумрадиз акъатнавай Мерд Алидин “Акьуллу пехърекай”  гьикая кIелайла,  завайни жуван кьилел атай гьа ихьтин са шумуд­ агьвалатдикай кхьин тавуна акъвазиз хьанач.

Са сеферда зун секиндиз куьчедай гъуз физвай. Бирдан атана зи кьилел са залан шей ацукьна ва кIуф яна. Тадиз кьилел гъил хкажай заз акуна, ам пехъ тир. Ада заз акI кIуф яна хьи, лап кьиляй иви акъатдайвал. Гуьгъуьнлай чир хьайивал, ада мукай чилел аватнавай вичин шарагдал къаравулвалзавайди тир кьван…

Кьвед лагьай мисал. Зун кIва­­­ле къатканвай. Каци къвез, зи кьилихъ гьарайзава. Садра  ка­­тарзава, кьведра, ваъ, кац алат­завач. “Я гьайван, ваз завай вуч  кIанзава?” лагьана, за ракIар акьал­на. Ваъ, ракIар чухвазва, мадни къатиз гьарайзава. “Я Аллагь, идаз вуч кIанзаватIа?” лагьана, къарагъна зун.

Зун  акурди, кац тадиз зи вилик экечIна. Физва ам, адан гуьгъуьналлаз — зунни. Зун акъвазайла, вични акъваззава. Мукьвал-мукьвал заз вил язава, зун къвезватIа акваз. Тухвана ида зун гурарай виниз къуншидин къа­вал са турбадин патав. Ам гьанал акъвазна, гьарайиз га­тIун­на. Фена килигайтIа, турбада шенпIи акIанва.

“Я язух гьайван, ви гьерекатар, гьараюнар гьахьняй тир ман”.

ШенпIи акъудайла, кац зал са къайдада элкъвезвай хьи, такурбур, белки, ягъадач жеди. На лу­гьуди, ида заз сагърай лугьуз­ва. Зун хъфидалди ам гьанлай юзанач. Зун хъфиз эге­чIайла, ада зун вичин вилералди рекье ­хтуна.

Эхь, гьайванрихъни ахъайна куьтягь тежедай гьайбатар, аламатар авайди я. Абурун гьарайдизни гьай лугьун, чаз чиз, суваб кIвалах я.

Марьям Магьамдалиева


Всего просмотров: 23

Читайте также: