Гьахъвал гъалиб хьана

Дагъустандин халкьди эхиримжи 2-3 йисуз вилив хуьз хьайи кар и йикъара кьилиз акъатна: Президент Владимир Путинан 6-майдиз акъатай 199-нумрадин Указдалди, Кьурагь райондин КIирийрин хуьряй тир Зейнудин Лукьманович Батмановаз кьейидалай кьулухъ Россиядин Федерациядин Игитвилин тIвар гана. Эхирни гьахъвили винел пад къачуна.

Зейнудин Батманова 2015-йисан майдин вацра террористри кьунвай хизан азад хъувун, къутармишун патал вичин чан къурбандна. Бандитри адаз чпин дестедихъ галаз алакъа хуьн, тамай гуя мейит жагъанва лагьана таб авуналди, Кьурагь райондин ОВД-дин начальникдиз зенгна, оперативный дестени галаз, тамун уьруьшдиз эверун буйругънай. Амма Зейнудин Батманов абуруз табий хьанач. “Хаин жедалди, заз кьейитIа хъсан я”, — уьтквемвилелди ихьтин эхиримжи гафар сивяй акъуднай къагьриман хци. Гуьллейрин хирер алай адан мейит Сулейман-Стальский ва Кьурагь районрин сергьятра авай тамун уьруьшдай жагъанай.

Къанлудив гена жаза агакьна — адаз 19 йис кар атIана. Силисдин органри кIватIнавай субутдин делилрал асаслу яз, Нариман Башировак РФ-дин УК-дин са шумуд статьядай (къанунсуз яракьламиш хьанвай тешкилатда иштиракун, къанун-къайда хуьдай органрин къуллугъчийрин чандиз къаст авун, сад ва адалай артух инсанар кьин… вири санлай 16 статьядай) тахсир кутуна.

Игитвилелди телеф хьайи хциз гьукуматдин награда гун патал Кьурагь райондин, ФЛНКА-дин руководстводи, Дагъустандин халкьдин тIварунихъай Халилбег Халилбегова РД-дин Кьилин ва РФ-дин Президентдин администрацийриз са шумудра чарар рекье тунай. Тамам пуд йис арадай фейила, эхирни ингье и кар кьилиз акъатна.

Зейнудин Батманован кьегьалвили чи халкьдихъ уьтквем, жуьрэтлу, герек макъамда чанни гуз гьазур къагьриманар авайди мад сеферда субутзава. Къуй рагьметлудан багърийрин рикIериз Аллагьди сабурар гурай, веледрихъ хушбахтлу уьмуьр хьурай!

Игитар эбеди я! Зейнудин Батманован тIварни чи рикIера, уьтквемвилин, къагьриманвилин лишан, чешне яз, асирра амукьда.

Мегьамед Ибрагьимов, «Лезги газетдин» кьилин редактор


Всего просмотров: 315

Читайте также: