Фригърин аялрин агалкьунар

Спортдин акъажунриз дегь заманайрилай инихъ чпел фикир желбзавайди, абур вири девирра итижлу хьайиди тарихдайни ачух­да­каз малум жезва. Мадни а кар ри­кIел хкиз кIанзава хьи, къенин йи­къан спортдин акъажунрин хейлин жуьреяр чпел ата-бубайри амал авурбурукай я. Месела, чIе­ме­­рук­рай лишан ягъун, къван гадарун, цIил­ ялун, кьуршахар кьун ва икI мад, са тIимил дегишвал кваз, чаз агакьнавай ирс я. Къенин юкъуз­­ни а важиблувал чи халкьари рикIелай алуднавач. И барадай Хив райондин Фригърин хуьруьн ДЮСШ-дин  (директор — Эмир Сефиханов) кIва­лахдин нетижаярни чпел дамахдайбур я. Кьилди къа­чур­тIа, алай йисан мартдиз Дербент шегьерда ММА-дай Кьиблепатан Дагъустандин кIвен­кIве­чивал патал кьиле фейи акъажунра  жегьил 200 спортсменди иштиракна. Абурун арада Фригърин ДЮ­СШ-да вердишвилер къачузвай 4 аялни авай. И акъажунра 7-классда кIелзавай Али­ев Самир — 1 (34 кг), Алиев Амин  — 2 (46 кг) ва 55 кг-дин заланвал авайбурун арадани Саид Мурсалов  (шикилда) 1-чкай­риз лайихлу хьана.

Махачкъалада апрелдиз клубрин арада кIвен-кIвечивал патал ММА-дай кьиле фейи бягьсера Мурсалов Саида -1, Алиев Самира  (тренер — Нуратдинов Эмин) 2-чкаяр кьуна, чеб умуд кутаз жедай же­гьил спортсменар тирди тести­кьарна.­

Дагъустандин  спортдин ва физический культурадин министерстводи “Спорт — террордиз, СПИД-диз акси я” лишандик кваз Кьиблепатан Дагъустандин ДЮСШ-рин арада апрелдиз тешкилай акъажунар  Белиж поселокда кьиле фена. И акъажунра Дербентдай, Кьурагь, Мегьарамдхуьруьн, Хив, Сулейман-Стальский районрай атанвай, гьакIни Белиж поселокдай  тир 100-далай виниз  спортсменри иштиракна. Къизгъин акъажунрин нетижада Белиждин ДЮСШ-дин команда — 1, Фригърин ДЮСШ-дин команда — 2 ва Сулейман-Стальский райондин  ДаркIушрин команда 3-чкайриз лайихлу хьана.

Фригърин ДЮСШ-дин командадик кваз акъажунра 5-классда кIелзавай  Мегьамедханов  Фархада (26 кг) — 2, Сефиханов  Аскера (6 кл., 28 кг) — 1 (шикилда чапла патахъ галайди) ва Алиев  Самира­ (7 — кл., 30 кг) 1-чкаяр (шикилда — эрчIи патахъ галай­ди) кьуна.

Апрелдиз Фригърин  ДЮСШ-да дзюдодай (тренер — Эмир Сефиханов) райондин кIвенкIвечивал патал “Спорт — сагълам уьмуьрдин замин” лишандик кваз ачух акъажунар кьиле фена. Ана чкадинбурулай гъейри, Мегьарамдхуьруьн, Дербент, Кьурагь, Сулейман-Стальский районрай ва Белиж поселокдай тир 120-далай виниз жегьил спортсменри чпин устадвал къалурна. И акъажунра, 5 спортсменди 1-чкаяр кьуналди, Фригърин ДЮСШ- дин команда гъалиб хьана. Аферин!

Ингье а командадик квай же­гьил пагьливанрин тIварар: Гьасанов Мугьамед (27 кг, 5-кл), Мегьамед­ханов Фархад (29 кг, 5-кл), Сефиханов Ас­кер (32 кг, 6-кл), Алиев Самир (35 кг, 7-кл), Абдулаев Гьалим (50 кг, 9-кл).

Майдиз Къаякент райондин  Пер­­­­вомайск хуьре залан атлети­ка­­дай РД-дин кIвен­­­­­­­кIве­чивал па­тал акъажунар  кьиле  фе­на. Ана Фригърин ДЮ­­СШ­-дин тренер-муаллим  Исмаилов  Алимегьамед  2-чкадиз ла­­йихлу хьа­на (ши­­килда — чапла патахъ галайди).

Лугьуз жеда хьи, гьар жуьредин шабагьриз лайихлу хьанвай Фригърин ДЮСШ — дин спортсменри ва тренерри чпи бубайрин ирс давамарзавайди ва мягькемарзавайди, чIехи несилдин ватанпересвилин руьгьдаллаз виликди физвайди чпин гьунарлу краралди тестикьарзава. Идахъ галаз сад хьиз, гьам хуьруьн, гьам райондинни республикадин майданра кьиле тухузвай  акъажунра вичин гьакъисагъ зегьмет, руьгьдин къуват, гьевес ва аш­къи галатун тийижиз раижзавай Фригърин ДЮСШ-дин директор Сефиханов Эмир муаллимдиз чухсагъул лугьуз кIанзава.

Абдул Ашурагъаев


Всего просмотров: 27

Читайте также: