ФЛНКА-диз виниз тир къимет гана

13-июлдиз РФ-дин Президентдин патав гвай миллетрин алакъайрин рекьяй Советдин Президиумдин нубатдин заседание хьана.

Анал РФ-дин государстводин милли политикадин Стратегия уьмуьрдиз кечирмишунихъ ва адак дегишвилер кухтуниз талукь месэлаяр веревирд авунихъ галаз сад хьиз, Лезгийрин фе­деральный милли культурадин автономиядин (ФЛНКА) кIвалахдиз виниз тир къимет гана. Автномиядин регьбер Ариф  Керимовав  Россиядин Президент В.В.Путинан патай чухсагъул малумарзавай махсус чар вахкана.

Президент В.В.Путинан 2018-йисан 30-майдин 131- нумрадин тупшуругъдал асаслу яз, ФЛНКА-дин президент Ариф Пашаевич Керимоваз “Зегьметда къазанмишнавай агалкьунрай, активдаказ общественный кIвалах тухунай” Россиядин Федерациядин Президентдин патай чухсагъул малумарнава.

А.Керимовав Чухсагъулдин чар РФ-дин Президентдин Администрациядин руководителдин заместитель Мегьамедсалам Мегьамедова ва эцигунрин, ре­гионар вилик тухунин месэлайрай Россиядин Федерациядин Гьукуматдин Председателдин заместитель, милли политикадин месэлаярни вичин гуьзчивилик квай Виталий Муткоди вахкана.

Вичин зегьметдиз ихьтин къимет гунай сагърай лугьуналди, А.Керимова уьлкведин Кьил В.Путина милли политикадин месэлайриз кьетIен фикир гузвайди къейдна: “В.Путина милли политикадин месэлайриз гьамиша кье­тIен фикир гуз хьайиди я, гьикI лагьай­тIа им  чи гзаф миллетрин векилрикай ибарат ва гзаф динрал амал ийизвай агьалияр яшамиш жезвай Ватандин садвилин, хатасузвилин, хушбахт­вилин бине тирди ада дериндай ан­намишзава. Зун инанмиш тирвал, В.В.Путинан регьбервилик кваз Россия дуьз рекье аваз физва ва адавай вичин вилик акъаз­завай четинвилер алудиз жеда. Государстводин абадвал патал зегьмет чIугвадай, Россиядин халкьарин садвал мягькемаруник жуван пайни кутадай мумкинвал аваз хьунал за дамахзава”.

Заседание кьиле фидай чIавуз 2025-йисан девирдалди тайинарнавай РФ-дин государстводин милли политикадин Стратегиядик дегишвилер кухтунихъ галаз алакъалу месэлайризни килигна.

Стратегиядин цIийи текстиниз талукь яз ФЛНКА-дин фикир гьихьтинди ятIа раиж авуналди, Ариф Керимова Стратегиядик Советрин Союз чкIайдалай гуьгъуьниз пайи-паяр хьана амукьнавай халкьариз – урусриз, лезги­ чIалан десте­дик акатзавай халкьариз маса ва талукь кьилдин пункт кутунин важиб­лувал къейдна. Ада малумарайвал, и месэладив вири терефрихъай мукьуфдивди эгечI, государствойри сихдаказ санал кIвалах тавунмаз пайи-паяр хьанвай халкьарин милли, культурадин ихтияррал тамамвилелди амал авун таъминариз жедач. И кIвалах дуьзгуьндаказ кьиле тухун патал, дибдин документ яз, и кардиз государстводин милли политикадин Стратегиядани къуват гана кIанда.

Мярекат кьиле физвай чIавуз Россиядин Федерациядин Президентдин патав гвай миллетрин алакъайрин рекьяй Советдин IX заседанидиз гьазурвал аквазвай гьални веревирдна.

Заседанидал и йикъара вичин 20 йис тамам хьун къейдзавай общест­венный организация тир “Россиядин халкьарин Ассамблея­дин” кIвалахди­кайни ихтилат кватна.

“Лезги газетдин” редакциядин коллективди А.П.Керимоваз вич лайихлу хьанвай чIехи награда мубаракзава ва адахъ чи уьлкведа миллетрин арада алакъаяр мягькемарунин, дуьньядин майданда Россиядин кесерлувал хкажунин, лезги чIалан дестедик­ акатзавай халкьарин милли, культурадин ихтиярар хуьнин важиблу ва жавабдар карда гележегдани агалкьунар хьана кIанза­ва.

“Лезги газет”


Всего просмотров: 50

Читайте также: