“Фири яру шив”

И мукьвара чи гъиле Бакудай ага­кьар­навай савкьат  — “Фири яру шив” тIвар алаз аялар патал кхьенвай махарин ктаб гьатна. Адан автор  Азизрин  Севда  я. Ктаб 500 экземплярдин тираж аваз чапдай акъатнава. Вижевай кIалуб­да авай ам гзаф гуьрчег шикилралди чIа­гурнава. Им жегьил автордин къелемдикай хкатнавай сифте ктаб я.

Вуж я чаз икьван гагьди вичикай са ар­тух хабар авачир Азизрин Севда? И су­алдиз жаваб чаз ктаб ахъайзамазди жа­гъизва: “И ктаб заз хайи чIал гзаф кIа­нарай, адан иервални верцIивал руьгьдик­ кужумиз тур жуван диде Седакъет Ке­ри­мовадиз бахшзава”. Шаир, Бакуда “Са­мур” газет акъудзавай бажарагълу публи­цист, тешкилатчи, “Сувар” ансамблдин ру­кодитель, инсанперес ва ватанперес Се­дакъет Къайинбеговна Керимовадин руш я ам!

Ктабда гьатнавай “Свас жагъурай кье­­гьал”, “Санал тIуьр фу”, “Шкьакь”, “Гзаф рахадай паб”, “Хъсанвилиз писвал”, “Хъалхъас баде”, “Дуствилин аламат”, “Фири яру шив” ва маса махар гьат­­на­ва. “Санал тIуьр фу” мах иллаки кье­­­тIен­ди я. Ам гьамиша верцIи тIуьнар нез вердиш хьанвай хандин хцикай (аялри адаз “Ферчин” лакIаб ганвай) я. Хабар­ гьинай? Са юкъуз хандин хци аялриз ви­чик кIвалинбурукай хъел квайдакай ихтилатда.

— Эхиз жезмач завай. Гьа сад хьтин тIуьнар гьикьван неда? Йифди-югъди веч­рен шиш, гьерен шиш, къавурмишай къазра як, яру гъед, вацIун гъед, гьуь-луьн­­ гъед, са герендилай — емишар. Сивин иштягь квахьнава зи. Са куьнини дад хгузмач, — лугьуда.

Гадади “эхи тежезвай вичин дердер” ахъаюнивай, яб гузвай аялрин сивяй яд авахьиз, руфунри кьуркьурзавай. Вирида гьа сакIа — садра кьванни ада незвай затIарикай чпини дадмишуникай фикирзавай. Хандин хци ихтилат куьтягьайла, Живера лугьуда: “Исятда ви сивин дад дегишарда чна…”

Эверда ада вичин гъвечIи стха Баркадиз, адан япал са вуч ятIани кушкушда. Барка кIвал галайвал чукурна фена. Са герендилай ам чантада са фуни аваз хтана. Живера а фал кьел кIвахна, серг алтадна, пайи-паярна, вири аялриз гана. Факай са кIус хандин хцелни ацалтна. Аялри иштягьдивди и фу акI незвай, адавайни акъвазиз хьанач. Сергни фу акь­ван­­ дадлу тир хьи, гадади, вичин хвеши­вал хуьз тахьана, хабар кьазва:

— Живер, зун сакIани гъавурда акьаз­вач. И сергни фу вучиз икьван ширин ятIа?

— Бес ваз санал тIуьр фу ширин жедайди чидачни? — жаваб гана Живера…

Эхь, ихьтинди я дуствални санал незвай фу! Дуствили гьар садаз хъсан иштягь ва гуьзел майиларни хуьдайдал шак алач.

“Фири яру шив” ктаб мубарак авуналди, чаз къелемдин дуст Азизрин Севдадихъ яратмишунрин рекье мадни еке агалкьунар хьана кIанзава.

Рагнеда Рамалданова


Всего просмотров: 34

Читайте также: