Фетягьан чубан

2019-йисан 25-июлдин вацран “Лезги газетдин” 30-нумрадиз акъатай С.-А. Абдурашидован “КицIин къайгъударвал” макъаладихъ галаз таниш хьайи чIавуз зи рикIел 2018-йисан августдин вацра вилералди акур са агьвалат хтана.

Зун, от­пуск къачуна, хуьруьз хтанвай. Са юкъуз зи фикирда Мугъулах дередиз сейр­диз фин гьатна. Экуьнин вахт тир. И де­реда авай куьгьне  КIурукIнарин хуьруьв агакьдалди, кIамун къене авай маларин фермадал дуьшуьш хьана. Ина гьич чан алай са касдинни лишан авачир. Са геренда ял ягъун паталди зун ина, къаравулдин кIвализ гьахьна, ярх хьана. Са кьадар вахтунда гуьзетна, бел­ки, фермадин иеси акъатда лагьана­. Хьанач. Зун винелди хкаж хьана. Ана, 500 метрдин мензилда, заз са вишдав агакьна къарамалар акуна. Абурун къвалавни са зурба кицI акъвазнавай. Малар юзана, векь нез, и дагъдин этегдай виниз физвай. КицIни, сес квачиз, гьабурун гуьгъуьниз хкаж жезвай. За эвер­на­тIани, кицIи яб ганач. И кардал  зун  аламат хьана.

Элкъвена зун хуьруьз хтай чIавуз за хуьруьнвийривай хабар кьуна и маларинни кицIин иеси вуж ятIа. Хуьруьнвийрикай сада заз “ам — ви къунши Фетя­гьан кицI, маларни чи хуьруьнбур я” лагьана жаваб гана.

Зун къунши Фетягьаз мугьман хьана ва адавай дагъда акур маларинни ки­цIин иеси вуж я лагьана, хабар кьуна. Фе­тягьа  вич я лагьана. Малар хуьзвай чубан маларин къвалав заз акур кицI я лагьана. Ада, югъ-йиф талгьана, маларал гуьзчивал ийизва. Экуьнахъ малар тевледай дагъдиз тухузва, югъди маларин гуьгъуьна жезва, нянизни ада малар­ тевледив ахгакьарзава. Йифизни анив гьич са касни агудзавач…

Зи рикIел мад са кар хтана: 1962-йисалди чи хуьре авайди вири 40 хизан тир. И 40 хизандихъ 2 агъзурдав агакьна чпин хсуси хипер ва 3 вишев  агакьна къарамалар авай. Алай вахтунда и хуьр шегьердиз элкъвенва. Хуьруьнвийри Ахцегьиз Ставрополдин, Краснодардин, Астрахандин ва маса регионрай  гъизвай  маларинни  лапагрин якIар къачузва, чпихъ як гьасилдай вири мумкинвилер аваз… ИкIни жеда кьван!..

А.М. Агьмедагъаев, илимрин кандидат


Всего просмотров: 51

Читайте также: