Етимдикай хьайи итим

Абдулкебиров  Эсрет  Халидович  1960-йисан 27-февралдиз Сулейман-Стальский райондин Вини СтIалрин хуьре дидедиз хьана. ГъвечIизмаз  етим хьайи, аялвилин шадвал, хайи дидедин чан-рикI такур Эсрета итимвилин, на­муслувилин бармак агъуз вегьенач. Хуьре 8-класс, 1977-йисуз Махачкъаладин культпросветучилище (хо­­реографиядин отделение) акьал­­тIарна, Кьулан СтIалрин клубда, художественный руководитель яз, хореографиядай кIвалахиз башламишна.

Советрин Армиядин жергейра къуллугъна хтай жегьилди 1983-йисалай (Кьулан СтIалрин клубдани зегьмет чIугваз) “Беневша” тIвар алаз музыкальный ансабль тешкилна. Саки 25 йисан вахтунда Эсрета регьбервал гана, гьакъисагъвилелди зегьмет чIугур и дестедин тIвар-ван Ставрополдани, Краснодарский крайдани акъатна. Са шумуд сеферда Яран сувариз Москвада  тухвай концертрай “Беневша” дестедиз кьилин чкаяр, идахъ галаз алакъалу яз, пишкешар, грамотаяр, дипломар гана.

Абдулкебиров Эсретан къелемдикай  вишералди шиирар, манияр хкатна. Абур, межлисрал, ме­хъеррал лугьуз, халкьдин сивера ама. Писни-хъсан фад акур, уькIуь-цуру дадмишай Эсрета вичин кьуд велед, вилин нинияр хьиз, хвена. Абуруз дуьз тербия гана, уьмуьрдин шегьредал акъудна. Гьайиф хьи, адаз вичин “Кьве къизилгуьл” ктаб аквадай мумкинвал хьанач. Ажалдиз мажал авач лагьайвал, ачух къилихрин, масад патал къене авай рикI акъудна гуз гьазур инсан, тербиячи, шаир, композитор, Дагъустандин культурадин лайихлу работник, ислягь хизандин кьил, етимдикай хьайи чешнелу итим Абдулкебиров Эсрет Халидович 2011-йисан 13-декабрдиз вахтсуздаказ кечмиш хьана. Адан хъсанвилер, экуь къамат чи рикIерай акъат­дач. Адан мурад, веси, рехъ-пеше хва Расула давамарзава, Ви­ни СтIалрин школада музыкадин ­тарсар гузва. Рагьметлу бубади хьиз, адани жегьилрин  “Беневша” группа тешкилнава, вичи тар язава. Расула вичин кьве веледдал чIехи бубадинни бубадин — Абдулкебир ва Эсрет тIварар эцигнава. Абуруни чпин бубайрин намусдин бармак вине аваз хуьдайдахъ чун инанмиш я.

Замир Мегьамедов, Вини СтIал


Всего просмотров: 72

Читайте также: