Етим Эмин

Етим Эминаз бахшнавай шиирар

Эминан цIийиз жагъай чIал

Айиб мийир, инсанар

Дустари заз гана хабар,

Алай чка къуьлуьн гьамбар.

Гьадан кIвализ фейитIа, кар

ТуькIуьн мумкин тир, инсанар.

 

Аваз-аваз ганач ризкьи

А касди заз, вич тир мискьи.

ЛагьаначтIан гафар векъи,

Ганач заз хийир, инсанар.

 

Хьунухь патал вичиз суваб,

Зи къайгъудиз ганач гьич яб:

Кьве къат хгун, тавуна таб,

А касдиз гьакъи, инсанар.

 

Гьулдан хьтин тIваларин кIатI,

Винел алай симин кьаматI,

Ийидай за сигаждал кьатI,

Хуьз хьанайтIа сир, инсанар.

 

Гурар кIане, кIатIавай къуьл,

Акурла зун хьана пехил,

Са килони ганач техил…

Эмин айиб мир, инсанар.

И шиир 1988-йисуз Ялцугърин хуьряй тир, алай вахтунда Эминхуьре яшамиш жезвай 54 йисан яшда авай кIвалин кайвани, шаирдин тухумдикай тир Рагьимова Гуьлагъадивай кхьин хъувурди  Саид-Агьмед Абдурашидов  я.

Гьарай

Етим Эмин, вун дамах я лезгийрин,

Шииратдиз йигин камар къачунвай.

Ви гьар са чIал шагьидар я девирдин,

Виликамаз дуьньядин гьал акунвай.

 

Адалатсуз хьанва – мадни къе уьлкве,

Чир жезамач, вуж буба я, вуж диде.

Им вуч бей адалат вахт хьанва еке!

Беймирветрин девир хьанва, эй Эмин.

 

Сада-сад гьакI чухвазава, верчер хьиз,

Дуьньяд девлет тарашиз гьарда вичиз,

Инсафсузар атайла къуллугъд кьилиз,

Аллагьдизни амач гьуьрмет, эй Эмин.

 

Инсанри чеб гузва маса, малар хьиз,

КIвалах жезва акур чIавуз вилик физ.

Ихтибар гьич чизмач ийин вуна низ?

Вуч завал я атанвайди, эй Эмин.

 

Мецел ширин шуьрбет алаз рахада,

Ихтилатар къенибур хьиз аквада.

ГьатайтIа вун са дуьшуьшда, кьарада,

Вун маса гуз къекъвез жеда, эй Эмин.

 

Тух жезавач, кIватIиз девлет дуьньядин,

Кесиб халкьар тазвач кIвале яз секин.

Хам акьалжна жанавурдин, кIевна чин,

Тарашчийрин девир хьанва, эй Эмин.

 

Гъетягъ Вадим, вун хьиз гьатна дердина,

Чанда иви ргазва зи датIана.

Мерд инсанар твадай чIавуз кIевера,

Мердмазарриз девран хьанва, эй  Эмин!

Вадим Жамалдинов

Туькезбаназ ахварай…

Туькезбан руш алазва чар булахдал,

Кабаб хьана, такIандав рикI агатдач.

Эмин гада акъвазнава дамахдал,

Авур зулум, кIарабрайни акъатдач.

 

РикIер гьатна мад цIаяра гьижрандин,

Куь вилерай дуьнья язва са зиндан.

Куз-хъукъвазвай, масан бала жейрандин,

Рекьел – цацар, акунач квез югъ – девран.

 

Кагьрабаяр Туькезбанан вилерай, –

Булахдин яд кьуна бирдан къадриди!

Булахар хьиз акъатзавай чилерай,

ПIузаррал хъвер: – Зун Аллагьди гайиди!

 

Шадвилин нагъв пайда хьанвай береда,

Аквазвай куьн гуьнедаллай лифер хьиз.

Гъамни гьижран амачир а дереда,

Шагьварди шад хура твазвай, кифер гъиз.

 

ЦIайлапандин ишигъ гьатна кIвале ви,

На лугьуди, цава женгер – къиямат.

А береда, мад тIал гьатна рикIе ви:

Къакъатнавай Зулжалалдин аманат…

Эйзудин Сайдумов


Всего просмотров: 71

Читайте также: