Экуь къаматдиз бахшна

ЦIийи йисан вилик квай йикъара Махачкъалада, Али Алиеван тIварунихъ галай Олимпиададин резервдин спортшколада, азаддаказ кьуршахар кьунай гьар йисуз тухузвай турнир кьиле фена. Акъажунар ачухуниз талукь мярекатдал шегьердин спортдин, туризмдин ва жегьилрин крарин рекьяй Комитетдин председатель Марат Ибрагьимова адан иштиракчийрин ва мугьманрин тIварцIихъ чими келимаяр лагьана.

— И турнир кьиле тухун хъсан адетдиз элкъвена са шумуд йис жезва. Чун мад ва мад сеферра и залда кIватI жезва. Акьалтзавай несил патал важиблу кар я: ам Ильман Алипулатован — гъвечIидан экуь къаматдиз бахшна тешкилзава. Ада спортда, кIелунра  вичихъ еке гележег авайди къалурнавай, вичин таяр-туьшериз ва вичелай хейлин чIехи аялризни ада чешне къалурзавай. Куьне ахьтин ксарилай чешне къачун лазим я. Заз квехъ виридахъ агалкьунар хьана, куьне датIана куь винел кIвалахна, четинвилериз килиг тавуна, агалкьунрин рекьихъ ялна, гъиле кьунвай вири крар эхирдалди кьилиз акъу­дуналди, багърийрин рикIер шадарна кIанзава, — лагьана ада.

Мярекатдал рахай РД-дин кьуршахар кьунай спортдин федерациядин вице-президент, Олимпиададин категориядин судья Убайдула Османова Али Алиеван тiварунихъ галай школади гьазурай кьван машгьур спортсменар ри­кIел хкана. Ада и турнирдин иштиракчийрини ге-лежегда Дагъустандин тIвар машгьурдайдахъ, абурукай гьасиррин зурба пагьливанар хьунихъ умудлувал къалурна.

Машгьур журналист ва общественный деятель  Ильман Алипулатова и турнир вичин хтул Ильман Алипулатов — гъвечIиди хайи юкъуз кьиле тухузвайди рикIел хкана.

— И югъ зун, чи хизан патал перишанди я. Гьар са касдихъ вичин кьисмет ава. Халикьди зи хтулдиз анжах 16 йис уьмуьр кьисметна. Кьилел атай мусибатдилай кьулухъ яшамиш жедай къуват жагъурун зун патал виридалайни еке имтигьандиз элкъвена. За жуван багърийрихъ галаз санал фонд ачухна. Чун инсанриз куьмек гуз алахъзава. И турнир вучиз азаддаказ кьуршахар кьунай кьиле тухузва лугьуз завай мукьвал-мукьвал хабар кьазва. Ильмана спортдин и жуьредин сирер чирзавай. И залда адахъ галаз санал тренировкайра хьайи аялар, адаз вер­дишвилер гайи тренерар  ава.

За жаван спортсменриз яргъал уьмуьрар, зурба агалкьунар хьун, гьа и спортзалда чпин пешекарвилин рехъ башламишай ва зурба кукIушриз хкаж хьайи ксарин дережадиз акъатун алхишзава, — лагьана И.Алипулатова.

Нубатдин сеферда кьиле тухвай турнирда республикадин жуьреба- жуьре районрай тир 200-дав агакьна спортсменри чпин устадвал къалурна.

Генеральный спонсорар машгьур меценат, общественный деятель Имам Яралиев ва “Возрождение Дербента” фонд тир.

“Лезги газетдиз” акъажунрин тешкилатчийри хабар гайивал, 2020-йисалай турнирдин дережа дегиш жеда. Ильман Алипулатован —  гъве­чIидан экуь къаматдиз бахшнавай республикадин турнир Кьиблепатан Дагъустандин жуьреба-жуьре шегьерра ва районра кьиле тухуда.

Рагнеда  Рамалданова


Всего просмотров: 114
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире