Эхиримжи зенгинин шадвилер — Докъузпарада

23-майдиз, гуьлуьшан юкъуз, дагълух Докъузпара райондин вири мектебра эхиримжи зенгиниз талукь шад мярекатар кьиле фена. Мектебрин вилик квай майданар гуьрчегдаказ безетмишнавай. Малум хьайивал, алай йисуз районда 63 жегьилди 11-класс куьтягьна, 182 жегьилди  – 9-класс.

Хуьрерин мектебра кьиле фейи мярекатра, чкадин муаллимрилайни аялрилай гъейри, райондин администрациядин, райондин образованидин управленидин векилрини иштиракна. Абуру выпускникриз экуь гележег ва уьмуьрда хкязавай цIийи рекьер бахтлубур хьун алхишна. Государстводин важиблу имтигьанар агалкьунралди вахкана, гележегда вузрик экечIна, пешедин иесияр – лайихлу инсанар хьана кIанзавай гафарни лагьана.

Эхиримжи зенгинин шад мярекат мектеб куьтягьнавайбур патал иллаки кьетIен, рикIел аламукьдай вакъиа я. Гьелбетда, мектебдай экъечIуни выпускникрик пашман гьиссерни кутазва.

Выпускникри чпиз гзаф йисара чирвилер ва тербия гайи муаллимриз чухсагъулдин гафар лагьана, шиирар кIелна ва манияр тамамарна.

Къейдна кIанда хьи, кIелунин 2018-2019-йисуз лап хъсандиз кIелайбур, муниципальный, республикадин дережада конкурсра ва спортдин акъажунра агалкьунар хьайибур грамотайралди къейдна.

Манийринни кьуьлерин, тебрикринни шадвилерин мярекатар эхиримжи зенг ягъуналди акьалтIна. Къуй чи выпускникрихъ имтигьанрани, инлай кьулухъ хкядай рекьерани агалкьунар хьурай!

«Лезги газет»


Всего просмотров: 22

Читайте также: