Дуьньядин чемпиондихъ галаз ихтилатарна

И йикъара Сулейман-Стальский райондин кьил Нариман Абдулмуталибов грекринни римлуйрин жуьреда кьуршахар кьунай кьве сеферда дуьньядин чемпион, кьасумхуьруьнви, Сулейман-Стальский райондин сейли ватандаш Алим Селимовахъ галаз шад гьалара гуьруьшмиш хьана. Идакай «Лезги газетдиз» райадминистрациядин пресс-къуллугъди хабар гузва.

Гуьруьшдин вахтунда спорт, образование вилик тухунин, машгьурунин, район арадал атайдалай инихъ 90 йис тамам хьуниз талукь суварин гьазурвилер акунин месэлаяр веревирдна. ТIвар-ван авай спортсменди райондин юбилейдин суварик атун, мастер-классар къалурун хиве кьуна ва Нариман Абдулмуталибоваз рикIел аламукьдай футболка пишкешна.

Вичин нубатда райондин регьберди Алим Селимоваз хайи райондиз атунай, районда спорт ва образование вилик тухунин месэлайриз дикъет гунай сагърай лагьана.

«Ватандивай яргъа аваз, куьне хайи чкаярни рикIелай ракъурзавач. Хайи райондин гележегдин гьакъиндай къайгъусузвалзавай инсан туш куьн. Гьар йисуз багърийрин патав хтуналди, куьне спортдин, образованидин агалкьунрикай хабар кьазва, жегьил спортсменрихъ галаз гуьруьшмиш жезва ва абур хъсан рекье твадай гафар лугьузва. Куьн чи райондин лайихлу векил я», — лагьана Н.Абдулмуталибова.

«Лезги газет»


Всего просмотров: 182

Читайте также: