Дуьньяда

Кьил хкажзава

Китайдин здравоохраненидин милли комиссиядин сайтда кхьенвайвал, коронавирус акатнавайбурун кьадар 70 агъзурдав агакьнава. Делилар “Lenta.ru” чешмеди раижна.

Эхиримжи делилралди, вирус акатнавайбурун кьадар 72436 тирди­ тестикьарнава. Эхиримжи суткада азардикди 142 кас кьена. И вахтун­да Китайда коронавирусдикди кьенвайбурун кьадар 1868 касдив агакьнава. Гьелбетда, вирусдихъ галаз вири жуьредин серенжемралди женг чIугвазва. Кьилди къачуртIа, вирус акатнавай 12552 кас азарханайра сагъар хъийиз алакьнава.

Идалай вилик биостатист ва эпидемиолог А.Лонджиниди къейд авурвал, Чилел яшамиш жезвай халкьдин пудай са паюник цIийиз пайда хьанвай коронавирус акатун мумкин я.

Къатидаказ чкIанвай азардиз ВОЗ-ди (Всемирная организация здравоохранения) “COVID-19” официальный тIвар ганва.

Рафтарвилериз къимет гана

Россиядинни Туьркиядин арада хъсан алакъаяр ава, амма им Москва Анкарадихъ галаз вири крара рази жеда лагьай чIал туш. Ихьтин фикир Россиядин МИД-дин кьил С.Лаврова Мюнхенда хатасузвилин рекьяй кьиле фейи конференциядал лагьана, хабар гузва “Новости” РИА-ди.

Лаврова къейд авурвал, гьар гьи кьве уьлкве фикирда кьуртIани, абурун арада гьич са месэладин патахъайни тамамвилелди разивилер жедач. Адан гафаралди, Россиядинни Туьркиядин арада Сириядин Идлибдин гьакъиндай кутIуннавай икьрар Россиядин терефди террористрин тилитрихъ галаз женг чIугуникай кьил къакъудунихъ галаз алакъалу туш.

РикIел хкин, 2018-йисан сентябрдиз Сочида Россиядинни Туьркиядин саммит кьиле фейи вахтунда Идлибда гьалар пайгардик кухтунин гьакъиндай меморандумдал къулар чIугунай.

Ислягьвилин терефдар

Россия Ливияда гьалар сиясатдин рекьяй къайдадик кухтунин, ислягьвал хуьнин терефдар я. Госдумадин оборонадин рекьяй комитетдин председателдин заместитель Ю.Швыкина ихтилатзавайвал, Россияди кьве уьлкведин арада кьиле фейи рахунрин сергьятра аваз тайинарай къайдаяр чIурдач. Идакай «Новости» РИА-ди хабар гузва.

Ю. Швыкина къейд авурвал, Ливияда гьалар пайгардик кухтунин гьакъиндай сифте яз рахунрик кьил кутурбур Россия ва Президент В.Путин я.

“Дуьшуьшдикай менфят къачуналди, Ливия яракьралди, дяведин суьрсетралди таъминариз алахъзавай вирибур чна тахсирлу яз гьисабзава”, — лагьана Госдумадин векилди.

Алатай гьяддин юкъуз Мюнхенда Ливиядин гьакъиндай международный комитетдин сад лагьай гуьруьш кьиле фена. И комитет арадал гъунин къарар 19-январдиз Берлинда кьиле фейи конференциядал кьабулнай.

Идалай вилик Германиядин къецепатан крарин министр Х.Мааса Ливиядиз яракьар ракъурунин карда са жерге тахсиркарвилериз рехъ ганвайдакай малумарна.

Б.Асадак тахсир кутуна

Туьркиядин “Адалатлувилин ва еримлувилин партиядин” пресс-секретарь О.Челика Сириядин президент Б. Асадан яракьлу кьушунрик  баришугъвал чIурунай 20 агъзур сеферда кьван тахсир кутуна. Идакай “AnadoIu” агентстводин чешмеди хабар гана.

“Асадан гьерекатри Идлиб вилаятда баришугъвилин гьалар тахминан 20 агъзур сеферда чIурна”, — кхьенва чешмеда. Гьа са вахтунда Сириядин президент Асада малумарайвал, уьлкведин яракьлу кьушунри Алеппо ва Идлиб вилаятар, къецепатай арадал къвезвай манийвилеризни килиг тавуна, азад хъувунин гьерекатар давамарда.

Россияди ва Туьркияди ягъунар кьунин гьерекатар акъвазаруник кьил кутунатIани, январдин вацра Сириядин къуватри Идлибда боевикриз акси серенжемар кьиле тухвана. Гьукуматдин къуватри кьилиз акъудай гьужумдин нетижада Идлибдин къал-къиж авай саки са пай мулкар кьаз алакьна.

Гьазурайди — К.Ферзалиев


Всего просмотров: 49
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире